Eýrazııa ekonomıkalyq odaǵy ıntegrasııalyq úderiske oń serpin beredi

Búgin, 16 sáýir kúni Ortalyq kommýnıkasııalar qyzmetinde Qarjy vıse-mınıstri Berik Sholpanqulov pen salyq komıtetiniń tóraǵasy Ánýar Jumadildaev baspasóz máslıhatyn ótkizdi. Onda ıntegrasııalyq úderistegi salyq pen salyq salý jáne memlekettik satyp alýlarǵa qatysty máseleler sóz boldy. Bul týraly egemen.kz tilshisi habarlady. Aldaǵy mamyr aıynda qurylatyn Eýrazııalyq ekonomıkalyq odaqtyń mán-mańyzy týraly baıandaǵan B.Sholpanqulov, odaq aıasynda bolatyn salyq tártipteri týraly áńgimeledi. Sóıtip, sóz kezegin salyq komıtetiniń tóraǵasyna berdi. «Elbasynyń strategııalyq bastamalarynyń biri – Eýrazııalyq odaq ıdeıasyna bıyl 20 jyl toldy. Osy ýaqyt aralyǵynda Qazaqstan, Reseı, Belarýs memleketteri arasyndaǵy ıntegrasııalyq ıgilikter tıisti damý satysynan ótti. Aldaǵy mamyr aıynda úsh eldiń basshylary kelisimge qol qoıady dep kútilýde. Eýrazııalyq ıntegrasııa memleketterdiń ózara ekonomıkalyq qarym-qatynas máselelerin ǵana qamtıdy. Sondyqtan, bul oraıda salyqtyq ákimshilendirý máseleleri de erekshe oryn alatynyn atap ótkim keledi», - dedi Á.Jumadildaev. Buǵan deıin Eýrazııalyq ekonomıkalyq odaqtyń Keden odaǵyna múshe úsh memleketiniń aýmaqtarynda qatysýshy elderdiń ekonomıkasynyń turaqty jáne tıimdi damýyna jaǵdaılar jasaýǵa jáne halyqtyń ómir súrý deńgeıin arttyrý úshin qurylǵan Birtutas ekonomıkalyq keńistik jumys isteı bastaǵan-dy. Birtutas ekonomıkalyq keńistik jasaý orasan zor naryq qurýǵa, bıznesti damytýdy yntalandyrýǵa, sondaı-aq básekege qabiletti taýarlar men qyzmetterdi óndirýdi ósirýge baǵyttalǵany málim. Osy jumystardy saralaǵan komıtet tóraǵasy, kásipkerlerge taýar sapasyn jaqsartý kerektigin aıtty. «Elimizdiń bıznes ókilderi 170 mıllıondyq naryqqa shyǵyp otyr. Osynyń ózi óndirilgen taýarlardy ótkizýge úlken múmkindik jasaıdy. Biraq bul, Reseı men Belorýs elderi bizdiń kásipkerlerdi qushaq jaıyp kútip otyr degendi bildirmeıdi. Naqty nátıjege qol artý úshin elimizdiń bıznes ókilderi básekelestikke qaýqarly bolyp, taýardyń sapasyn jaqsartyp, osy aýqymdy naryqty erkin ıgerýi óte mańyzdy», dedi komıtet tóraǵasy. Kásipkerler Keden odaǵy aıasynda elge ákelgen taýarlaryna tólenetin salyqty 50 kúnniń ishinde tólep, esep-qısabyn ótkizýi  tıis eken. Negizi, taýar elge kirgennen keıin sol sátten bastap kelesi aıdyń 20-syna deıin óziniń janama jáne qosymsha salyqtary tólenýi kerek. Máselen, kásipker  taýaryn aıdyń birinshi kúni kirgizse, kelesi aıdyń 20-syna deıin 50 kún ýaqyty bolady. Bul Keden odaǵynyń eń ońtaıly tusy kórinedi. Komıtet tóraǵasy kásipkerlerge osy qaǵıdalardy eskerip, óz paıdalaryna jaratýǵa keńes berdi. Sebebi, buǵan deıin kásipkerlerge elge taýaryn kirgizý úshin tıisti salyqtardyń barlyǵyn aldyn ala tóleýi qajet edi. Jańa tártiptiń arqasynda, olar budan bylaı salyqtaryn tólemeı turǵan kezde-aq, ákelgen taýarlaryn birden naryqqa shyǵarýlaryna jol ashylypty. Osylaı, kásipkerliktiń keńistigi taǵy da keńeıe túsedi. Nurbaı Elmuratov. Derekkóz: egemen.kz. Foto: Ortalyq kommýnıkasııalar qyzmeti.