Elordadaǵy Fýtbol úıinde ótken jıynda QFF prezıdenti qazaqstandyq BAQ ókilderimen kezdesip, resmı túrde Qazaqstan ulttyq quramasynyń jańa bas bapkerin tanystyrdy. Ádilet Bármenqulov Magomed Mýsaevıchtiń ulttyq quramanyń bas bapkeri laýazymyna taǵaıyndalýyna baılanysty pikir bildirdi.
«Halyqaralyq kúntizbeniń ereksheligin jaqsy bilesizder. On bir kúnde tórt match ótkizý qıyn bolady. Biz jetkilikti túrde kúızeliske, ıaǵnı strestik jaǵdaıǵa túsetinimiz anyq. Sondyqtan nege mundaı sheshim qabyldaǵanymyzdy túsindirgim keledi. Qazir bizge jattyqtyrýshylyqtan bólek, basqarýshylyq quzyret te óte mańyzdy bolyp tur. Men bul qıyn jaǵdaıdan abyroımen shyǵý kerek ekenin túsinemin. Adıevtiń aldyndaǵy birinshi mindet – fýtbol oınaýǵa qolaıly jaǵdaı jasaý. Tańdaý nege dál Magomed Mýsaevıchke tústi degen suraqqa jaýap berer bolsam, bizde Adıevten bólek, taǵy birneshe kandıdat tóbe kórsetti. Olardyń ishinde reseılik SSKA klýbynyń bapkerler quramyndaǵy otandasymyz Grıgorıı Babaıan da bar bolatyn. Onymen de sóılesip kórdik. Biraq jasyratyny joq, men keıingi eki jylda Magomed Mýsaevıchpen birge jumys istedim, onyń basqarýshylyq quzyretke ıe ekenin jaqsy bilemin. Taǵy da qaıtalap aıtamyn, qazirgi strestik jaǵdaıda dál osy tańdaýdy jasaý kerek boldy», dedi Bármenqulov.
44 jastaǵy Magomed Adıev ulttyq qurama tizginin ustaǵanǵa deıin Qaraǵandynyń «Shahterin» baptaǵan edi. Al Federasııa basshysy QFF prezıdenttigine saılanǵanǵa deıin «Shahter» klýbynda dırektorlar keńesiniń tóraǵasy bolǵan. Al Adıev byltyrdan beri «kenshiler» klýbyn jattyqtyryp keldi. Sondyqtan ekeýi jaqsy tanys. Onyń ústine, Magomedtiń Qaraǵandy klýbynda jumys isteýine Ádilet Bármenqulovtyń tikeleı qatysy bar ekenin umytpaýymyz qajet.
Sondaı-aq Federasııa basshysy jıyn barysynda naýryz aıynda ulttyq quramanyń bas bapkeri mindetin atqarǵan Andreı Karpovıchke jumysy úshin alǵysyn bildirip, QFF onyń kásibı damýyna jan-jaqty qoldaý kórsetetinin atap ótti. Al óz kezeginde Magomed Adıev ulttyq qurama jankúıerlerge qandaı fýtbol usynatyny týraly oıyn ortaǵa saldy.
«Aldymen Qazaqstan fýtbol federasııasyna senim artqany úshin alǵys aıtqym keledi. Jaýapkershiligi mol, qyrýar jumys kútip turǵanyn jaqsy túsinemin. Qysqa merzim ishinde birneshe oıyn ótkizemiz. Sol sebepti barlyq oıynǵa keshendi daıyndyq júrgizý kerek. Máselen, Ázerbaıjanǵa daıyndalyp, Slovakııany da umytpaǵan abzal. Sondyqtan naqty qurylymdy anyqtap, tórt oıynǵa tııanaqty daıyndyq júrgizemiz. Ýaqyt az. Oıynshylardy almastyryp otyrýǵa týra keledi. On bir kúnniń ishinde tórt match ótedi. Bapkerlermen sóılesip, aqyl-keńes alyp, barlyq máseleni talqylap otyramyz. Jańa tájirıbeniń jaqsy jańalyq ekenin de aıta ketken jón. Federasııa tarapynan maǵan qandaı mindetter aıtyldy? Eń bastysy – quramaǵa tek daıyn jigitterdi ǵana shaqyryp qoımaı, jas fýtbolshylardy da tartyp, olardy eresekter oıynyna beıimdeý. Sodan keıin komandanyń ishinde durys qarym-qatynas ornatý. Bolashaqtyń negizin búginnen bastaý shart. Komandanyń qataryna jańa oıynshylar shaqyrylýy yqtımal. Qysqa merzim ishinde qaralatyn birneshe úmitker bar. Sodan soń olardy shaqyrý týraly sheshim qabyldaımyz», dedi Magomed Mýsaevıch.
Osy oraıda oqyrmandardyń «Magomed Adıev kim? ulttyq quramaǵa jetekshilik etetindeı qandaı jetistigi bar?» degen suraqtaryna az-kem jaýap berip kóreıik. 1978 jyly Cheshenstan astanasy – Groznyıda dúnıege kelgen Magomed Adıev 16 jasynda alǵash ret «Ingýshetııa» klýbymen kásibı kelisimshart jasasyp, úlken fýtbolǵa qadam basty. Keıinnen Reseıdiń tómengi lıgalarynda óner kórsetetin «Anjı», «Spartak-2», «Sokol», «Terek», «Nıjnıı Novgorod» jáne Ýkraınanyń «Krıvbass» klýbtarynda dop tepti. Tipti ol 2003 jyly elordalyq «Jeńis» sapynda da bir jyl oınap, 11 oıynda 5 gol soqty. Fýtbolshy karerasynda aıtarlyqtaı jetistikke qol jetkize almaǵan M.Adıev 2009 jyly fýtbolshy retinde kásibin doǵaryp, bapkerlik jumysqa bet burdy.
Oıynshy retinde bıik belesterdi baǵyndyra almaǵan fýtbolshylardyń bapkerlik ónerde baǵy janyp jatatyn jaıttardy jıi kezdestiremiz. Biraq 2010 jyldan bastap bapkerlikke bet burǵan Adıevke ázirge mundaı baq qona qoıǵan joq. Reseıdiń «Nıjnıı Novgorod», «Volga», «Anjı», «Ahmat» sekildi klýbtarynda qyzmet etken ol byltyr Qaraǵandynyń «Shahter» klýbynyń tizginin ustap, «kenshiler» komandasyn bir jyldyń ishinde joǵary oryndarǵa jeteledi. Iаǵnı Konferensııa lıgasynyń pleı-off kezeńine deıin alyp shyqty. Endi Ulttar lıgasynda óner kórsetetin Qazaqstan ulttyq quramasyn qandaı bıikterge jetkize alar eken?
