Parlament kásipkerlikti damytýǵa jol ashatyn taǵy bir zań jobasyn talqylady

Búgin, 16 sáýir kúni Parlament Májilisiniń otyrysynda «Ruqsattar jáne habarlamalar týraly» zań jobasy jáne oǵan ilespe zańdyq qujat eki oqylymda qaralyp, maquldandy. Bul týraly egemen.kz tilshisi habarlady. Negizinen bul zańdyq qujat ruqsat berý júıesin biryńǵaı qaǵıdattar men tásilderdi paıdalana otyryp retteýge baǵyttalǵan. Atap aıtqanda, elimizdegi kásipkerlikti odan ári damytýǵa, onyń qyzmet aıasyn keńeıtýge múmkindik beretin bolady. Bul rette tutynýshylar, kásipkerler jáne memleket múddeleri naqty aıqyndalyp, memlekettik organdar qyzmetiniń ashyqtyǵy men aqparattyń qoljetimdigi qamtamasyz etiledi. Zań jobasy boıynsha baıandama jasaǵan О́ńirlik damý mınıstri Bolat Jámishev zań jobasynyń elimizdegi ruqsat berý júıesi problemalaryn sheshýge baǵyttalarynan habardar etti. Onyń málimetine qaraǵanda, qoldanystaǵy ruqsattamalardyń tolyq tizbesi jasalady. Jańa ruqsattar berýdi engizýde retteýshi áserlerdi taldaý qoldanylady jáne ruqsattar qaýiptilik dárejesi boıynsha sanattarǵa bólinedi. Mınıstr sondaı-aq barlyq ruqsat berý rásimderin júzege asyrýdaǵy biryńǵaı standarttalǵan tásilderdi bekitý jáne «jalǵyz tereze» qaǵıdattaryn neǵurlym keńinen qoldaný kózdelgendigin de ortaǵa saldy. Zań jobasynda ruqsat pen habarlamanyń 54 pýnktin joıý tetikteri kórinis tapqanymen, áli de 737-i qalyp otyr. «Bizde kóptegen organ ózine bıznestiń qandaı da bir deńgeıde táýeldi bolǵandy qalaıdy. Osymen kúresýge tıispiz. Buǵan barynsha salmaqtylyqpen qarap, shaǵyn jáne orta bızneske barynsha jaǵdaı jasaýymyz kerek», - dedi Parlament Májilisiniń tóraǵasy Qabıbolla Jaqypov osyǵan oraı. Asqar Turapbaıuly. Derekkóz: egemen.kz.