Instıtýttyń jetekshi ǵalymdary men sarapshylar jıyn barysynda Prezıdent Q.Toqaevtyń jalpyulttyq referendým ótkizý bastamasyn qoldaı otyryp, reformalar nátıjesinde elimizdiń saıası dıskýrsy, quqyqtyq, áleýmettik-ekonomıkalyq barysyna qatysty ózgeristerge qatysty basymdyqtarǵa toqtaldy.
Konferensııany ınstıtýttyń Saıası zertteýler ortalyǵynyń dırektory, fılosofııa ǵylymdarynyń kandıdaty Aıdar Ámrebaev júrgizdi.
Konstıtýsııaǵa ózgerister men tolyqtyrýlar engizý boıynsha referendým ótkizýdi qoldaıtyn Almaty qalalyq shtabynyń múshesi, Fılosofııa, saıasattaný jáne dintaný ınstıtýtynyń bas dırektory, akademık Serik Seıdýmanov konferensııaǵa qatysýshylar tarapynan qoıylǵan suraqtarǵa jaýap berdi. Qazirgi kezde respondentterdiń alpys paıyzdan astamy referendýmǵa qatysýdy qoldaıdy. Al aldaǵy kúnderde bul kórsetkishtiń arta túsetindigine senim bildirgen S.Seıdýmanov quqyqtyq órkenıettilik, ishki saıası mádenıetke qatysty máselelerge toqtaldy.
Saıasattanýshy, UQSK múshesi Rasýl Jumaly «Buǵan deıin elimizde, halyqaralyq keńistikte oryn alǵan saıası ahýaldy eskergende Prezıdent Q.Toqaevtyń qoǵam aldyna saıası reformalardy júzege asyrýǵa qatysty sheshim qabyldaýy batyl qadam», dep atap ótti. «Al referendým ótkizý órkenıetti qoǵamǵa tán. Árıne, bolar iske synshy kóp. Osy oraıda kez kelgen eldegi saıası reformalardy oı eleginen ótkizip, taldaý jasaýdyń mańyzy mol», dedi sarapshy. R.Jumalynyń aıtýynsha, búginde memlekettik qurylym osyndaı saraptamalyq ǵylymı tujyrymdarǵa zárý. «Qoǵamdy sońǵy onjyldyqtarda beleń alǵan ádiletsizdik, áleýmettik teńsizdik, jemqorlyq, ashyqtyqtyń jetkiliksizdigi sııaqty faktorlar alańdatyp keldi. Osy oraıda kóshe demokratııasymen emes, qoǵamnyń ózin saıası úrdisterge qatystyra otyryp oń nátıjege qol jetkizýdiń mańyzyn ýaqyt kórsetip otyr. Osy oraıda ózgeristerdi qalap otyrǵan qoǵam úshin referendýmnyń barysyn túsindirý jumystary jetkiliksiz júrip jatyr», degen R.Jumaly saýatty, órkenıetti aqylǵa jeńdiretin reformalar dál osy kezeńde elimiz úshin asa qajet ekenin atap ótti.
Fılosofııa ǵylymdarynyń doktory, professor Murat Sábıt halyqtyń áleýmettik jaǵdaıyn jaqsartý, kadrlar daıarlaý, qoǵamdaǵy ádilettilik týraly pikirimen bólisip, eldegi reformalardy qoldaıtyndyǵyn bildirse, ınstıtýttyń bas ǵylymı qyzmetkeri, fılosofııa ǵylymdarynyń kandıdaty Raýshan Sartaeva «О́tpeli kezeńde elimiz jańǵyrýyna baǵyttalǵan mindetterdi jyldam júzege asyrýdyń mańyzyna toqtalyp, áleýmettik, quqyqtyq mádenıetti arttyrý, rýhanı damýymyzǵa mán bere otyryp, myqty quqyqtyq bazamyzdy qalyptastyrý qajet», dep atap ótti. Bul baǵytta sapaly bilimniń, otbasynyń, bútindeı qoǵamnyń belsendiligi mańyzdy ekenin de alǵa tartty.
Eýrazııa ǵylymı-zertteý ınstıtýtynyń aǵa zertteýshisi Áben Dáýren reformalardy júzege asyrýdan týyndaǵan qarama-qaıshylyqtar tóńireginde oı qozǵap, árbir pikirge qatysty dáıekti oılaryn ortaǵa saldy.
Sarapshylardyń pikirinshe, syndarly kezeńde júzege asatyn is-qımyldarǵa baılanysty synı pikirlerdiń bolatyny zańdylyq. Degenmen ishki, syrtqy jaǵdaılardy eskere qaraǵanda Prezıdent ustanyp otyrǵan reformatorlyq baǵyttyń qorytyndysy taıaý keleshektiń enshisinde. Al jalpyulttyq referendýmnyń nátıjesi árbir qazaqstandyqtyń el bolashaǵyna degen seniminen kórinis tabady.
ALMATY
