Búginde kolledjderdegi bilim sapasyna qatysty aıtylatyn syn kóp. Alaıda jastardy jańa kásipke baýlýda, kásiptik baǵdar alyp, joǵary oqý ornyna daıyndaýǵa úlken mán beriletin kásiptik baǵdarly oqý oryndaryna zamanaýı kezeńde jańasha kózqaras qalyptastyrý qajettigi ýaqyt talabynan týyndap otyr.
Almaty kópsalaly kolledjinde «Meniń bolashaq mamandyǵym» taqyrybymen ótken festıval kásiptik-tehnıkalyq bilimdi mamandar daıarlaýdyń mańyzyn asha tústi. Búginde ońtústik astanada 80-nen astam kolledj bolsa, aıtýly is-sharaǵa 50-den astam kolledjdiń oqytýshylary men stýdentteri qatysyp, qala mektepteri oqýshylarynyń saýaldaryna jaýap berdi.
Tehnıkalyq jáne kásiptik bilim berý júıesiniń onkúndigi sheńberinde qalalyq bilim basqarmasy bilim berýdegi jańa tehnologııalardyń ǵylymı-ádistemelik ortalyǵynyń uıymdastyrýymen ótken festıvaldiń maqsaty – eńbek naryǵynda suranysqa ıe mamandyqtardy tańdaý, elimiz ekonomıkasyn damytý jolynda mektep oqýshylaryn kásibı baǵdar alýǵa shaqyrý, qoldaý kórsetý.
Qalalyq bilim berýdegi jańa tehnologııalardyń ǵylymı-ádistemelik ortalyǵy TjKBB bólim basshysy Gúlnar Jálelqyzynyń aıtýynsha, segiz aýdannyń mektepterinen qatysqan oqýshylar mol maǵulmat alyp qana qoımaı, bolashaq baǵdaryn anyqtaýǵa da múmkindik aldy. Festıval oqýshylardyń eńbek naryǵynda suranysqa ıe mamandyqtar týraly túsinikterin keńeıtýge, bolashaq mamandyqty sanaly túrde tańdaýǵa, sonymen birge jumysshy mamandyqtardyń bedelin arttyryp, bolashaq túlekter arasynda orta kásiptik bilimdi tanymal etýge yqpal etedi», dep atap ótti.
Festıval aıasynda qala mektepterinen jınalǵan 4 myńnan astam oqýshy tehnıkalyq jáne kásiptik bilim berý uıymdaryna túsý erejelerimen tanysyp, mamandyqtar týraly keńeıtilgen aqparat aldy. О́zderin tolǵandyrǵan suraqtarǵa jaýap alyp, oqýlaryn kolledjde jalǵastyrý týraly oılanyp qaıtqany kezdesýdiń nátıjeli bolǵanyn kórsetedi. Bolashaq talapkerler kóbine AT salasyna, pedagogıkalyq, medısınalyq, qoǵamdyq tamaqtaný mamandyqtaryna qyzyǵýshylyq bildirgen.
Gúlnar Jálelqyzy atap ótkendeı, kóbine balalary úshin ata-analar mamandyq tańdap jatady ári munyń kóp jaǵdaıda oń nátıje beretini anyq. Sondyqtan festıvalge ata-analar da shaqyrylyp, balalarmen birge qajetti aqparattar aldy. Tipten, keıbir ata-analardyń balalaryn kolledjge jibermeımiz degen raıynan aınyp qaıtqany qýantady. Kolledj stýdentteriniń óz mamandyqtaryna baılanysty daıyndaǵan taqyryptyq nómirleri kelýshilerdiń qyzyǵýshylyǵyn arttyra túsip, jylyna bir márte ótetin festıvaldi qaıtalap ótkizýge usynys bildirdi.
ALMATY
