Saýda ornynyń ákimshisi Muhametqalı Áriphannyń aıtýynsha, ózge saýda oryndaryna qaraǵanda, mundaǵy taýarlardyń baǵasy áldeqaıda arzan. О́ıtkeni sertıfıkattalǵan sapaly ónimniń bári fermerden tutynýshynyń qolyna eshbir deldalsyz tikeleı tıedi.
– Munda satylatyn taýardyń negizgi bóligin Qostanaı aýdanynyń fermerleri óndiredi. Máselen, osy aýdanda eshki baǵatyn sharýashylyq eshki súti men irimshik, súzbe sekildi densaýlyqqa paıdaly ónimderin saýda sóresine shyǵardy. Eń bastysy, turǵyndar arzan ári sapaly azyq-túlik ónimderin satyp alý múmkindigine ıe bolyp otyr, – dedi M.Áriphan.
Jańa ashylǵan saýda orny, ásirese bal bıznesimen aınalysatyn kásipkerler úshin tıimdi bolyp otyr.
– Bizdiń jekemenshik omartamyz bar. Qaraqumyq balyn 1400 teńgeden, ártúrli ósimdikterden jınalatyn baldyń kılosyn 2800 teńgeden satyp jatyrmyz. Mundaı saýda ortalyǵyn kópten kútip júr edik. Buryn dúkenderdiń kireberisinde, kóshede, kók bazarda turyp satýǵa týra keletin. Endi arnaıy saýda ornymyz bar, múmkindigimiz de keńeıe túseri sózsiz, – dedi omartashy Tatıana Kreker.
Fermerler dúkeniniń ashylý rásimine kelgen turǵyndardyń kóptiginen saýda sórelerindegi taýarlar tez ótip ketti. Al sóresi bosap qalǵan dúkenshiler aldaǵy ýaqytta taýardyń kólemin arttyramyz dep ýáde etti.
Qostanaı oblysy
