Onyń aıtýynsha, elimizde mektepke deıingi bilim berý salasyndaǵy oń ózgeristerge qaramastan, júıeli sheshimdi qajet etetin birqatar kúrdeli máseleler oryn alyp otyr.
Depýtat mektepke deıingi bilim berý salasyndaǵy bar problemalardy birneshe negizgi bloktarǵa bólýge bolady dep esepteıdi. Onyń ishinde: qarjylandyrý máseleleri, jalpy jáne ǵylymı tásilder, kadrlyq qamtamasyz etý jáne osy saladaǵy sapaly qoldaý da bar.
Osy faktorlardyń aıasynda mektepke deıingi sala qyzmetkerleri pedagogıkalyq jáne psıhoemosıonaldyq turǵyda aýyr jaǵdaıǵa tap bolady. Balalarǵa qol kóterýge deıin qatygezdik tanytý, sondaı-aq mektepke deıingi uıymdardaǵy pedagogtar tarapynan tártiptik buzýshylyqtar jıi oryn alyp otyr.
«Barlyq mektepke deıingi uıymdarda 3 jasqa deıingi balalarǵa arnalǵan balabaqsha toptaryn ashý ýaqyt kúttirmeıdi. Jergilikti atqarýshy organdar qazirgi jaǵdaı men boljaý derekterin taldaý negizinde óńirdiń strategııalyq josparymen baılanystyra otyryp, mektepke deıingi salany damytýdyń qysqa merzimge arnalǵan keshendi josparyn ázirleýi qajet. О́ńirde jan basyna shaqqandaǵy qarjylandyrý koeffısıentin ulǵaıtý jóninde sharalar qabyldanýy tıis. Saralanǵan jáne mólsherlemelik aqy tóleý júıesiniń tetikterin paıdalana otyryp, mektepke deıingi uıymdardyń pedagogterine eńbekaqy tóleý júıesin qaıta qaraý qajet», dedi senator.
