Alqap dabyly alys emes

Byltyr eginshilik túsimin rekordtyq kórsetkishke jetkizgen Aqmola oblysynyń dıqandary ústimizdegi jyly da bıik mejeden kóriný qamynda. Qysqy agrotehnıkalyq sharalardyń jumys kestesine saı júrgizilýi, ónimdiligi joǵary tuqymnyń jetkilikti qamtamasyz etilýi, ásirese, mashına-traktor parkiniń buryn bolmaǵan deńgeıde jańǵyrtylýy jaqsy úmitke jetelep otyr. Bıyl qys qytymyrlaý minez tanytyp, kóktem uzaqqa sozylyp turǵanymen, táýekelshil aımaqtyń dıqandary talaı synǵa qarsy turyp daǵdylanǵan, deıdi oblystyq aýyl sharýashylyǵy basqarmasynyń basshysy Amanbek Qaljanov. Iаǵnı, basty naýqanǵa daıyndyq jaman emes. Uıymdyq sharalar da aldyn ala pysyqtaldy. Bıyl 4,7 mıllıon gektar egistik alqaptyń 4,2 mıllıon gektaryna dándi jáne burshaqty daqyldar sebiletin bolady. Parly alqaptar aýqymynyń keńýi, aýyspaly egis pen ylǵal saqtaý tehnologııasynyń jappaı qoldanysqa engizilýi jumys tıimdiligi men túpki qaıtarymdy eseleıtini anyq. Amanbek Ámirhamzaulynyń aıtýynsha, egistik alqaptarynyń qurylymynda ártaraptandyrý baǵyty odan ári jalǵasyn tappaq. Aldymyzdaǵy naýqanda 271,1 myń gektar jerge maıly daqyldar tuqymy sebiledi. Bul – byltyrǵy jylǵy deńgeıden 20 myń gektarǵa jýyq artyq. Osy oraıda, aýyl sharýashylyǵyndaǵy ıntegrasııalyq yqpaldastyqtyń óristeýi tıisti nátıjesin beredi degen senim bar. Oblysta Kanadanyń, Germanııanyń ǵalymdary kóp jyldardan beri tájirıbe synaqtaryn ótkizip, ónimdiligi joǵary burshaq daqyldaryn jersindirýde ıgi ister atqardy. Bıyldyń ózinde Kanada elshisi men provınsııa basshylary basqarǵan delegasııa Kókshetaýǵa eki ret kelip ketti. Olar «Rodına» agrofırmasyndaǵy aımaqtyq keńeste oı-paıymdaryn ortaǵa salyp, ıntegrasııalyq baılanystar sheńberin keńeıtýge yqylasty ekendikterin bildirdi. Sondaı-aq, oblys ákimi Qosman Aıtmuhametov bastaǵan delegasııa Belarýs Respýblıkasyndaǵy Grodno oblysynda bolyp, kópjaqty yntymaqty qatynastar qujattaryna qol qoıdy. Aldyn oılaıtyn dıqandar bul qadamdardan da jaqsylyq kútedi. Bıyl oblystyń eginshilik sharýashylyǵyn damytýǵa memleket tarapynan 9,2 mıllıard teńge sýbsıdııalyq qarjy bólinip otyr. Bul salalyq jalpy jumysty úılesimdi júrgizýge septigin tıgizýmen qatar, Astananyń azyq-túlik beldeýin nyǵaıtýdaǵy jańa jobalarǵa serpilis qosatyny belgili. Baqbergen AMALBEK, «Egemen Qazaqstan». Aqmola oblysy.