Erlan Qoshanov jıynda Memleket basshysy Qasym-Jomart Toqaevtyń bastamasymen qazir elimizde aýqymdy ózgeris bolyp jatqanyn aıtyp, óńir halqyn Abaı oblysynyń qurylýymen quttyqtady.
– Semeı – Alash arystarynyń basyn qosqan qazaq rýhanııatynyń qara shańyraǵy. Sondyqtan tarıhı turǵydan qaraıtyn bolsaq, aýmaqtyq jaǵynan, halyq sany jaǵynan alsaq ta, ádil sheshim boldy dep oılaımyn. Endeshe, sizderdi sol tarıhı ádilettiliktiń ornaýymen shyn júrekten quttyqtaımyn, – dedi Palata Spıkeri.
Májilis Tóraǵasynyń aıtýynsha, Prezıdenttiń Abaı oblysyn qurý týraly sheshimi aımaqtyń odan ári órkendeýine tyń serpin beredi.
– Abaı óńiri, Semeı jeri tarıhtyń jańa paraǵyn ashty. Biz Abaı oblysynyń shańyraǵyn halqymyzben, Prezıdentimizben birge kóteremiz. Osy iste Parlament Májilisi, Amanat partııasy da sizdermen birge bolady, – dedi Májilis Spıkeri.
E.Qoshanov el taǵdyryn aıqyndaıtyn úlken maqsat-mindetterge toqtalyp, ol jalpyhalyqtyq referendýmnan bastalatynyn atap ótti.
– Jańa Qazaqstan degenimiz ne? Qazir eń jıi qoıylatyn suraq osy. Prezıdent jýyrda buǵan naqty jaýap berdi. «Ol – Ádiletti Qazaqstan» dep dóp basyp aıtty. Al jańaqazaqstandyq qandaı bolýy qajet? Muny osy topyraqta týǵan uly Abaı bir jarym ǵasyr buryn aıtyp ketken. Ol – bes nárseden qashyq bop, bes nársege asyq bolý. Qarap otyrsańyzdar, Abaı fılosofııasy Prezıdentimizdiń Jańa Qazaqstan týraly kózqarasymen tolyq úndesip tur. Sondyqtan jastardy bilimge, eńbekke baýlý, osy bes qasıetti boıyna sińirý mańyzdy, – dedi Palata Spıkeri.
Erlan Qoshanov Prezıdent reformalarynyń jańa múmkindikterge jol ashatynyn aıtyp, aldaǵy ýaqytta Parlamenttiń róli kúsheıetinine, elimizdiń saılaý júıesinde de birqatar ózgeris bolatynyna mán berdi.
– Ákimder saılaýy el arasynda jıi aıtylyp júr. Biz oǵan kezeń-kezeńmen kele jatyrmyz. Byltyr elimizde 1 myńǵa jýyq aýyl ákimin halyqtyń ózi saılady. Keler jyly aýdan ákimderin saılaýǵa kirisemiz. Oblys basshylaryn taǵaıyndaý máselesine keler bolsaq, buryn Prezıdent usynǵan jalǵyz kandıdat 20-30 oblystyq máslıhat depýtatymen kelisiletin. Endi Memleket basshysy tarapynan kem degende eki úmitker usynylady. Ony barlyq deńgeıdegi máslıhat depýtattary tańdaıtyn bolady, – dedi E.Qoshanov.
Erlan Qoshanov Abaı aýdanyndaǵy Qaraýyl aýylyna baryp, jurtshylyqpen kezdesti. Onda Prezıdent bastamalarynyń mán-mańyzyn túsindirip, aýyl zııalylary men turǵyndarynyń pikirin tyńdady.
– Elimizde Qaraýyldy bilmeıtin qazaq joq shyǵar. Bul – adamzatqa ǵulama Abaıdy syılaǵan qasıetti topyraq. Osynda sizdermen júzdeskenime qýanyshtymyn. Jańa Qazaqstan qurýǵa baǵyttalǵan Memleket basshysynyń saıası reformalary tóńireginde ózderińizben áńgimelesý úshin arnaıy keldim. Prezıdent el taǵdyryn qalyń jurttyń ózi sheshkenin qalap otyr. Osynaý jaýapty kezeńde halyq pen bılik birtutas bolýymyz kerek. Memleket basshysyna qoldaý bildirip, referendýmǵa bir kisideı atsalysýǵa, tarıhı tańdaý jasaýǵa shaqyramyn, – dedi Palata Tóraǵasy.
Zııaly qaýym ókilderi Abaı aýdany jurtshylyǵynyń reformalardy jaqsy qabyldap jatqanyn jáne aldaǵy referendýmǵa atsalysatyndaryn aıtty.
– Bul reformalardyń bári halyqtyń kókeıinde júrgen suraqtarǵa jaýap beredi. Biz ony jaqsy túsinemiz. Eldiń ıesi, jerdiń ıesi – halyq degen sóz júregimizge jaqyn tıdi. Prezıdentimiz jumysqa kirisken kúnnen bastap osy demokratııalyq prosesterdiń júzege asýyn sóz etip júr. Biz ony tolyq qoldaımyz, – dedi Abaı aýdanynyń qurmetti azamaty Amantaı Muqataev.
Kezdesý sońynda jınalǵandar Prezıdentke Abaı oblysyn qurýǵa uıytqy bolǵany úshin aýdan atynan alǵysyn jetkizdi.
– Oblysymyz qurylyp jatyr. Zor maqtanyshpen, úlken úmitpen qarap otyrmyz. Prezıdentimiz Qasym-Jomart Kemelulyna bizdiń sálemimizdi jetkizińiz. Abaılyqtar men Abaı urpaqtary sheksiz alǵysyn bildiredi. О́ńirimizdiń gúldenýine bárimiz atsalysamyz, – dedi Abaı aýdanynyń qurmetti azamaty Tólegen Janǵalıev.
