Bıyl alǵash ret qolǵa alynǵan is-sharaǵa mektep oqýshylary, stýdentter men qoǵam jáne óner qaıratkerleri qatysty. Jıynda 100-ge jýyq adam Dına Nurpeıisova men ózge de tanymal kompozıtorlardyń týyndylaryn oryndap, bar ónerin ortaǵa saldy.
Halyqtyń qoshemetine bólenip, kúıdi sheber tartqandarǵa arnaıy syı-sııapattar berildi. Al úzdik ónerpazǵa úkili dombyra men «Dına Nurpeıisovanyń 25 kúıi jazylǵan jınaq» tabystaldy.
Aıta keteıik, Dına Nurpeıisovanyń eskertkishi byltyr 3 shildede «Ulttyq dombyra kúni» qarsańynda ashylǵan.
«Baǵdarlama boıynsha Dına Nurpeıisovanyń birneshe kúıi oryndaldy. Basty maqsatymyz – jastardy halqymyzdyń tól ónerine baýlý, osy arqyly elimizdiń patrıot jastaryn tárbıeleý. Osyndaı kúı jármeńkesin dástúrli túrde ótkizip turýdy qolǵa aldyq. Aı saıyn osy jerge halyq jınalyp, kúı tyńdaıtyn bolsa, odan artyq bizge qandaı baqyt kerek. Kelip, kóremin degen jandar ónerimizdi tegin tamashalaı alady. Ulttyq ónerdi súıetin qaýymǵa nıet-peıilimiz árqashan ashyq», deıdi «Kúı anasy» respýblıkalyq qorynyń jetekshisi Tólegen Qýanyshev.
Is-shara barysynda qoǵam jáne óner qaıratkerleri Dına Nurpeıisovanyń eskertkishine gúl shoqtaryn qoıyp, mańaıyna 15 shyrsha aǵashyn otyrǵyzdy.
Aıana Toǵanbek
