Onlaın formatta ótken konferensııaǵa Halyqaralyq Túrki akademııasynyń prezıdenti Darhan Qydyráli, M.Áýezov atyndaǵy Ádebıet jáne óner ınstıtýtynyń dırektory Kenjehan Matyjanov, Japonııanyń Hokkaıdo ýnıversıteti janyndaǵy slavıan-eýrazııalyq zertteý ortalyǵynyń dırektory Ýıama Tomohıko, E.A. Bóketov atyndaǵy Qaraǵandy memlekettik ýnıversıtetiniń rektory belgili ǵalym, professor, QR UǴA korrespondent-múshesi Nurlan Dýlatbekov, L.N. Gýmılev atyndaǵy EUÝ prorektory, QR UǴA akademıgi Dıhan Qamzabekuly, QR Japonııadaǵy elshiliginiń Keńesshi-ýákili Batyrhan Qurmanseıit qatysyp, M. Áýezov, Alash jáne Japonııa sabaqtastyǵyn jóninde ǵylymı oı-pikirlerimen bólisti.
Alqaly jıynǵa moderatorlyq etken Akademııa basshysy D. Qydyráli Alash qaıratkerleri men Japonııa arasyndaǵy baılanystar týraly baıandap, búgingi sharanyń Túrki álemi úshin mańyzdylyǵyna toqtaldy.
«Damyǵan Japonııamen Alash kósemderi ǵana emes, sonymen birge túrki zııalylary da yntymaqtastyq ornatyp, nátıjeli ister atqardy. Máselen, tatardyń jádıtshil qaıratkeri Abdýrashıd Ibragımov Aqmola oblysyna qarasty Atbasarda medrese ashyp, keıinnen Japonııaǵa qonys aýdaryp, aǵartýshylyq qyzmetin jalǵastyrǵan. Abdýrashıd Ibragımov, Ǵaıaz Ishakı, Muhammed Qurbanǵalıev syndy tatar, bashqurt zııalylary tarapynan 1924 jyly Tokıoda «Islamııa» mahallasy» uıymy qurylyp, 1927 jyly alǵashqy medrese ashyldy. Osy baǵytta qyzmet etken zııalylardyń túrki halyqtarynyń Japonııa týraly tanym-túsiniginiń keńı túsýine áseri bolǵany anyq. Sondyqtan, Alash qaıratkerlerine arnalǵan búgingi sharamyzdyń bir arnasy Japonııa baǵytyna baılanysty órbip otyr», dedi Akademııa basshysy.
О́z kezeginde, konferensııaǵa Japonııadan arnaıy qatysqan Hokkaıdo ýnıversıteti janyndaǵy slavıan-eýrazııalyq zertteý ortalyǵynyń dırektory Ýıama Tomohıko arhıv materıaldary negizinde Alash qaıratkeri Raıymjan Marsekovtyń Japonııa Úkimetine jazǵan haty týraly tyń aqparatpen bólisti.
Al Qazaqstannyń Japonııadaǵy elshiliginiń Keńesshi-ýákili Batyrhan Qurmanseıit japon jazýshylarynyń M. Áýezov jónindegi eskelikteri týraly baıandama jasady.
Sonymen qatar, alqaly jıynǵa tarıhshy ǵalymdar, tanymal zertteýshiler qatysyp tyńdarman boldy.
Aıta ketsek, Túrki akademııasy ǵylymı yntymaqtastyqty arttyrý maqsatynda Japonııadaǵy túrkologııa men shyǵystaný salasy birqatar ǵylymı ortalyqtarmen baılanys ornatqan.
