Konferensııa barysynda oblystaǵy qazaq baspasóziniń ótkeni men búgini, aqparat básekesindegi orny, óńirlik baspasózdegi aqparattyq janrlardyń ereksheligi, Muhametjan Seralınniń ómiri men qyzmeti, balalarǵa arnalǵan óńirlik basylymdardyń jaı-kúıi, tájik jáne qaraqalpaq baspasóziniń qalyptasýyndaǵy ult aǵartýshylarynyń eńbegi sııaqty ózekti máseleler sóz boldy. Jıynǵa qatysýshylardy quttyqtaǵan qoǵamdyq damý basqarmasynyń ókili Janar Tas-
qaıyrqyzynyń aıtýynsha, óńirde 118 BAQ tirkelgen eken, onyń 42-si qoǵamdyq-saıası baǵyttaǵy aqparat quraly bolyp tabylady. Odan keıin «Qostanaı tańy» gazetiniń bas redaktory Januzaq Aıazbekov sóz alyp, táýelsiz el, derbes memleket bolý degen uǵymdardy halyqtyń oı-sanasyna uıalatýda qazaq baspasóziniń orny orasan zor bolǵanyn erekshe atap ótti.
– Basqasyn aıtpaǵanda, oǵan kýá – osydan júz jyl buryn shyqqan «Aýyl» gazetiniń sarǵaıǵan betteri. Tarıhqa júginsek, «Aýyl» gazetiniń alǵashqy sany 1922 jyldyń 27 maýsymynda arab qarpimen shyqty. Ol ýaqyt turmys taýqymetimen qatar, ol áleýmettik teńsizdik beleń alyp turǵan kezeń edi. «Aýyl» gazeti osy bir keleńsiz qubylystarǵa qarsy kúres ashty. Bul basylym alǵashqy sanynan-aq, el men jer, til men dilge nazar aýdaryp, ulttyq qundylyqtarǵa qatysty túrli máselelerdi kótere bildi. «Aýyldyń» izbasary «Qostanaı tańy» gazeti de osy úrdisten aınymaı ulttyq múdde, memleketshildik máselelerin nasıhattap keledi, – dedi Januzaq Aıazbekov.
Qostanaı ýnıversıtetiniń professory Qalqaman Jaqyp «Aıqap» jýrnalynda kásibı kósemsózshi M.Seralınmen qanattasa el rýhanııatyna qyzmet etken qalamgerler týraly tyń derekterimen bólisti. Qalqaman Hasenulynyń bastaýynda Muhametjan Seralındeı alyp tulǵa turǵan «Qostanaı tańy» gazetiniń júz jyldyǵyna oraı, arnaıy jýrnalıster mýzeıin ashý týraly usynysy kópshilik qoldaýyna ıe boldy.
Atalǵan konferensııada aıtylǵan taǵy bir aqjoltaı jańalyqtyń biri Ahań ýnıversıtetindegi osydan birer jyl buryn jabylyp qalǵan «Bilim jarysy» gazetiniń qaıta shyǵa bastaýy boldy. Stýdent-jastarǵa arnalǵan atalǵan basylym 1998 jyldan beri shyǵady.
– Kezinde «Bilim jarysy» respýblıkalyq «Qazaq» gazetiniń qosymshasy retinde shyǵyp turdy. Sońǵy eki jyl ishinde belgili sebepterge baılanysty gazet jumysy toqtap qalǵan edi. Osydan eki apta buryn oblystyq gazettiń ujymymen kezdesý barysynda biz «Bilim jarysy» endi «Qostanaı tańy» gazetiniń qosymshasy retinde shyqsa degen usynys aıttyq. Bul usynysymyz oblystyq gazettiń bas redaktory men ýnıversıtet basshylyǵy tarapynan qoldaý tapty. Endi aldaǵy oqý jylynan bastap oqyrmandarǵa oblystyq gazettiń qosymshasy retinde jol tartady degen úmitimiz bar, – dedi ǵylymı konferensııanyń moderatory, jýrnalıstıka kafedrasynyń meńgerýshisi, PhD doktor Amangeldi Shórentaev.
Qostanaı oblysy
