Máshhúr Júsip oqýlarynyń mártebesi bıik

Aıta keterligi, buryn Máshhúr Júsip oqýlary tek oblystyq deńgeıde, ıaǵnı bizdiń aımaqta ǵana ótkizilip kelgen bolatyn. Respýblıkalyq deń­geı­de uıymdastyrý alǵash ret 2019 jyly qolǵa alynyp, Pavlodar qalasyn­da eleýsizdeý ótkeni bar. «Bul án bu­ryn­ǵy ánnen ózgerek» demekshi, bul sharanyń aýqymy keń, mazmuny bólek. Shyǵarmashyl jas órender doda­syn Qazaqstan Respýblıkasy Bilim jáne ǵylym mınıstrligi jáne «Daryn» respýblıkalyq ǵylymı-praktıkalyq ortalyǵynyń qoldaýymen uıymdastyrýshy – Pavlodar oblysy bilim berý basqarmasynyń «Ertis daryny» óńirlik qosymsha bilim berý oqý-ádistemelik ortalyǵy.

Saıysqa 10 oblystan, Nur-Sultan, Almaty, Shymkent qalalarynan jáne 2 respýblıkalyq bilim berý uıymynan 58 úmitker qatysty. Pavlodar oblysy bilim berý basqarmasy tarapynan júldegerlerge tigilgen júldeler de osal bolmady: bas júlde ıegerlerine – noýtbýk, I orynǵa – uıaly telefon, II orynǵa – symsyz qulaqqap, III orynǵa – Power Bank qýattaý qurylǵysy.

Respýblıkalyq Máshhúr Júsip oqý­larynyń Estaı atyndaǵy balalar mýzyka mektebinde ótýi, mekteptiń ónerli balalarynyń qonaqtardy kúm­birlegen kúımen qarsy alýy, sha­raǵa bastan-aıaq oblystyq bilim basqar­masy basshysynyń mindetin atqarýshy Á.Ábenovanyń bas-kóz bolýy, Pavlodar qalasyndaǵy «Máshhúr Júsip» qory (prezıdenti – Ertaı Júsipov) tarapynan Máshhúr Júsip shyǵarmalary toptastyrylǵan «Jetpis bap» kitabynyń meımandarǵa syıǵa tartylýy ǵulama babamyzdyń murasyn nasıhattaýdy maqsat tutqan sharanyń mán-mańyzyn asyra túskendeı.

Shyǵarmashyl órenderdiń jumysyn saralaǵan qazylar alqasynyń quramy tómendegideı: Qarlyǵash Sarekenova (L.N.Gýmılev atyndaǵy Eýrazııa ulttyq ýnıversıteti, f.ǵ.k.), aqyn Serikzat Dúısenǵazy (L.N.Gýmılev atyndaǵy Eý­razııa ulttyq ýnıversıteti, f.ǵ.k.), Maqsat Alpysbes (L.N.Gýmılev atyn­daǵy Eýrazııa ulttyq ýnıversıteti, t.ǵ.d.), Ertaı Júsipov (Toraıǵyrov ýnı­ver­sıteti, f.ǵ.k.), Aıtmuhamet Tu­ry­shev (To­raıǵyrov ýnıversıteti, f. ǵ.f.k., professor), Baqytgúl Qapaso­va (Toraıǵyrov ýnıversıteti, f.ǵ.k.), Maıgúl Orazhanova (Pavlodar pedagogıkalyq ýnıversıteti, f.ǵ.k.), aqyn Aıbek Oralhan (Pavlodar qalasynyń ortalyqtandyrylǵan kitaphanalar júıesiniń qyzmetkeri, Qazaqstan Respýblıkasy Jazýshylar odaǵynyń múshesi), Botakóz Quralqanova (Pavlodar pedagogıkalyq ýnıversıteti, f.ǵ.k.), aqyn-jazýshy Serik Elikbaı (To­r­aıǵyrov ýnıversıteti, f.ǵ.k.), Baıangúl Qojahmetova (Toraıǵyrov ýnıversıteti, gýmanıtarlyq ǵylymdar magıstri).

– Músháırada 15 jas darynnyń óleńderin tyńdadyq, olardyń bári qazaq poezııasynyń keleshek ókilderi dep bilemin. Saıystyń maqsaty – jas talanttardyń talabyn ushtaý, jastardy tarıhqa, shyǵarmashylyqqa, ádebıetke tárbıeleý. Talantty balalar ósip kele jatqanyna kózimiz jetti. Almatydan kelgen Daryn Beksultan degen óleń jazyp qana qoımaı, ony oqýy da erekshe eken. Qatysýshylar arasynda ustaz kórgen jas aqyndar bar. О́leń degenniń bári birdeı shyǵa bermeıdi. Oryn almaı qalǵan baladan da myqty aqyn shyǵady. Keı aqyndardyń óleńderi kásibı deńgeıge kóterilgen. Biz tipti ózderine óleń jazǵyzyp ta tekserip kórdik, – aqyn Serikzat Dúısenǵazy.

Aıta keterligi, Máshhúr Júsip oqý­lary aıasynda qazaq tili men áde­bıeti páni muǵalimderi úshin «Másh­húr­taný máseleleri jáne oqýshy­lar­dy ádebı oqýǵa daıyndaý ádiste­mesi» taqyrybynda semınar uıymdas­tyrylyp, qatysýshylarǵa L.N.Gýmı­lev atyndaǵy Eýrazııa ulttyq ýnıversı­tetiniń oqy­týshysy, fılologııa ǵylym­da­rynyń kandıdaty Qarlyǵash Sarekenova jáne Toraıǵyrov ýnıversıtetiniń gýmanıtarlyq ǵylymdar magıstri Baıangúl Qojahmetova ádistemelik dáris oqydy.

Baıqaý sońynda qatysýshylar, jetekshiler jáne qazylar alqasynyń músheleri Eskelige sapar shegip, Máshhúr Júsip Kópeıulynyń rýhyna táý etti.

Pavlodar oblysy,

Ekibastuz qalasy