«Bultty tehnologııalar, jasandy ıntellekt, robottandyrý bizdiń ómirimizdiń ajyramas bóligine aınaldy. Nátıjesinde eńbek naryǵyna jańa mamandyqtar enip jatyr. Qazaqstanda aldaǵy 5-10 jylda ekonomıkanyń 9 salasynda 239 jańa kásip paıda bolýy múmkin, al 95 kásip transformasııalanýda. Bul rette eldegi jumys oryndarynyń 52%-y avtomattandyrýdyń joǵary táýekeline ushyraıdy. Árbir ekinshi qyzmetker qaıta daıarlaýdan ótýge májbúr bolady. Jańa daǵdylardy meńgerý - tabysty qyzmettiń kilti. Sondyqtan kadrlardy jyldam ári ıkemdi daıarlaý úshin jaǵdaı jasaý mańyzdy», dedi Aqmádı Sarbasov.
Ol jaqyn arada jumys kúshiniń sapaly qurylymynyń ózgerýi jáne eńbekke qabiletti jastar aǵynynyń artýy múmkin ekenin, bul eńbek naryǵyna qosymsha júkteme ákeletinin atap ótti.
«2030 jylǵa qaraı Qazaqstandaǵy jumys kúshiniń 37%-y Z býyny bolady. Al urpaqtyń aýysýy jastardyń eńbek qyzmetine degen kózqarasynyń ózgerýimen qatar júredi. Bul ıkemdi jumys kestesi úshin qarjylyq jeńildikterge barýǵa daıyn urpaq, olar úshin kásibı jáne jeke ómir arasyndaǵy tepe-teńdik mańyzdy. Sondyqtan jumys berýshilerge talanttardy saqtap qalý úshin jańa talaptarǵa beıimdelý mańyzdy bolady», dedi vıse-mınıstr.
Aıana Toǵanbek
