2021 jyldyń 6 shildesi. «Elorda kúnine oraı Úrjar aýdanynda zamanaýı úlgide basseın ashyldy» dep alaqaıladyq. Aýyldyń qýanyshyn jarysa jarııaladyq. Basseın ǵımaratynyń kireberisine qyzyldy-jasyldy shar baılanyp, resmı túrde ashylý saltanaty jasaldy. Ásirese jasóspirimderdiń qýanyshynda shek bolmaǵan. Qysy-jazy sýda júzemiz dep qýandy. Beker eken. Basseınge shomylǵandy qoıyp, aıaq malǵan bireý bolmady.
Jyl ótip, aýdan turǵyndary narazylyq bildirgen soń, istiń mán-jaıyn bilmek nıette Úrjar aýdandyq sáýlet, qala qurylysy jáne qurylys bóliminiń basshysy Bolat Torsyqbaevqa habarlasqanbyz. Onyń aıtýynsha, basseınniń tapsyrys berýshisi Úrjar aýdanynyń sáýlet, qala qurylysy jáne qurylys bólimi eken. Alaıda kim qabyldap aldy, qalaı qabyldap aldy, bizge túsiniksiz.
– Basseındi oblystyq sport basqarmasy balansqa áli qabyldaǵan joq. Memlekettik sáýlet-qurylys baqylaý basqarmasy ókilderi kelip, birqatar olqylyqty aıtyp ketken. Merdigerler qaıta jasap jatyr. О́zgeris bolyp jatsa, habarlaımyz, – deıdi Úrjar aýdandyq sáýlet, qala qurylysy jáne qurylys bóliminiń basshysy Bolat Torsyqbaev.
Aıtyp ótkendeı, áýelde basseın ashyla sala oblystyq dene shynyqtyrý jáne sport basqarmasy teńgerimine alýy kerek bolǵan. Biraq qurylystan aqaý shyqqan soń olar qabyldaýdy keıinge qaldyrǵan. Aldymen atalǵan nysanǵa tekserý júrgizý keregin aıtyp, oblystyq sáýlet-qurylys baqylaý basqarmasyna hat joldapty. Mamandar teksere kele laýazymdy tulǵalarǵa qatysty ÁQBtK-niń 318-baby boıynsha ákimshilik is qozǵap, anyqtalǵan aqaýlardy joıýdy tapsyrǵan. Sonymen qatar jattyǵý kezinde qaýipsizdik erejelerin saqtaýdyń mańyzdy rólin eskere otyryp, quzyretti organdar usynǵan barlyq buzýshylyqtardy tolyq joıǵanǵa deıin basseın jumys isteı almaıtynyn aıtady sala mamandary. Al onyń qashan joıylatyny taǵy beımálim.
Dál osyndaı másele Kúrshim aýdanynda da bar. 2021 jyldyń qańtarynda Kúrshimde «Aýyl – el besigi» baǵdarlamasy aıasynda jabyq júzý basseıni ashyldy dep jar salǵanbyz. Iá, munda da kádimgideı aqsaqaldar aq tilekterin aıtyp, lentasyn qıǵan. Sol kezdegi sport bóliminiń basshysy basseınde júzý kestesi jasalatynyna deıin habarlap, eldi sendirgen. «Baqsam, baqa eken» demekshi, kúrshimdikterdiń de qýanyshy alysqa barmady.
– Kúrshimniń mańaıyndaǵy sýdyń bári qaýipti. Jazdygúni balalardyń shomylýy úshin birde-bir arnaıy oryn jasaqtalmaǵan. Qanshama adam sýǵa ketip jatyr. Byltyr balalar basseınde sýǵa júzýdi úırenedi ǵoı dep máz bolyp júrgenbiz. О́kinishke qaraı, sýy joq basseınniń lentasyn qıyp, ashylý rásimin saltanatty túrde dúrkiretip ótkizdi. Kózboıaýshylyqty qashan qoıar ekenbiz?! Endi mine, sybaılas jemqorlyqtyń qurmetine qoıylǵan eskertkishteı basseınimiz qańyrap tur, – deıdi aýdan turǵyny Merýert Erkinqyzy.
Jasyryp qaıtemiz?! Qandaı da bir nysan ashylyp alyp, jumys istemeı tursa, ıá bolmasa, sapasy syn kótermeı jatsa, qoǵam biraýyzdan «aqshasyn jep qoıypty» degen pikirdi ustanady. Kim bilsin?! Qolda aıǵaq bolmaǵan soń, dóp basyp jaza da almaımyz. Deıturǵanmen, shóptiń basy jel turmasa qımyldaı ma?
Kúrshim aýdany ákiminiń orynbasary Erlan Shoraıaqovtyń aıtýynsha, jabyq basseın ǵımaratynyń qurylysyn «SK-KazAlem» JShS qurylys kompanııasy júrgizgen eken. Bul úshin qazynadan 450 mln teńge qarjy bólingen. Qazirgi ýaqytta quzyrly organdar tekserý júrgizip jatqan kórinedi. Qalaı degenmen, Shyǵys Qazaqstannyń qurylys salasynda salǵyrttyq basym. Meıli úı qurylysy bolsyn, jol salý nemese sý tartý bolsyn, problemasyz aıaqtalmaıdy. Tıisti qarjy bólingenimen, sapa da joq.
Al Úrjar men Kúrshimdegi basseın qurylysynan ketken olqylyqtar Katonqaraǵaı aýdanynyń basshylaryna sabaq bolsyn deımiz. Aıta keteıik, Katonqaraǵaı aýylynda da jabyq basseın qurylysy júrgizilip jatyr. Qazirden bastap jaýapkershilikpen qaramasa, erteń Úrjar men Kúrshimniń kebin kıip júrmesine kim kepil?!
Shyǵys Qazaqstan oblysy
