Sýperfınalda 5 medal jeńip aldy

Mádenıet jáne sport mınıstr­ligine qarasty Sportty damytý dı­rek­sııasynyń málimeti boıyn­sha, ja­rystyń alǵashqy kúni teh­nıkalyq baǵ­darlamada óner kórsetken qazaq­standyq sportshylar 2 júldege qol jetkizse, kelesi kúngi jarysta osy ıgi dástúrdi laıyqty jal­ǵas­tyryp, taǵy 3 ret tu­ǵyr bıi­gine kóterildi.

Baıraqty básekeniń birinshi jarys kúninde tehnıkalyq baǵ­darlamada úzdik úshtiktiń qatarynan kóringen Qa­zaqstannyń qyzdar komandasy (8 sportshy) erkin jat­tyǵýda nátıjesin jaq­sarta tústi. Bul joly «Moana» anıma­sııa­lyq fılmindegi Vaiana ánine óner kórsetip, kúmis júldeger atan­dy (81,5333 ball). Izraıl qura­masy 1-shi, Slovakııa 3-orynǵa jaı­ǵasty. Osy­dan biraz kún buryn Aýstralııada vırtýaldy formatta ótken jarysta tóreshiler bizdiń sport­shylarǵa dál osy baǵdarlama (ol kezde de jerlesterimiz Vaiana ánine bılegen edi) úshin 79,6000 upaı bergen bolatyn.

Edýard Kım men Jaklın Iаkımova juby tehnıkalyq jattyǵýyna Chicago fılmindegi All that Jazz ánin tańdap, sheberlikterin pash etti. Nátıjesinde, tóreshilerden 78,2740 upaı alyp, qola júldege ıe boldy. Bul synda ıspa­nııalyq Emma Garsııa men Paý Rıbes top jarsa (83,3138 ball), kúmis júldege amerıkalyq Klaýdııa Kolettı men Kennet Gode ıelik etti.

Sonymen qatar erler arasyndaǵy jekeleı synda Edýard Kım 2019 jylǵy «Evrovıdenııa» jeńimpazy Dýnkan Loýrenstiń Arcade ánine óner kórsetip, qola júldege ıe boldy. Bıyl alǵash ret el namysyn osyndaı úlken jarysta qorǵaǵan Edýardtyń «Mahabbat tarıhy» dep atalatyn baǵdarlamasyna tóreshiler 74,8478 ball berdi. Al komandalyq synda Qazaqstan quramasy Olena Ýýtaıdyń «Tabıǵat úni» mýzykasyn tańdap, bar sheberligin kórsete aldy. Nátıjesinde, AQSh pen Izraılden keıingi 3-orynǵa turaqtady.

Fınaldyń sońǵy kúni aralas ko­mandalardyń erkin kombınasııa saıy­synda Qazaqstan (10 sportshy) «Ispan bıi» nómerimen qola medal­ǵa qol jetkizdi (80,8000). Jarys qo­jaıyny Grekııa quramasy altyn, Izraıl kúmis medal jeńip aldy.

Bul sýperfınalda 4 altyn, 1 kúmis júldesi bar Ispanııa sportshylary jeńiske jetse, Aýstrııa quramasy – ekinshi (4 altyn), AQSh – úshinshi (2 altyn, 3 kúmis, 4 qola) saty­dan kórindi. Qazaqstan qura­masy 1 kúmis, 4 qola júldemen 8-orynǵa taban tiredi.