Eraly Toǵjanovtyń aıtýynsha, elimizde Dauletten qaıyrymdylyq qorynyń jumysy aıasynda «Bala-shaǵamen soltústikke» jobasy júzege asyrylýda. Vıse-premerdiń málimetinshe, joba aıasynda 1300 adam ońtústikten soltústik óńirlerge kóshýge ótinish bildirgen. Negizinen Túrkistan oblysynyń, sondaı-aq Mańǵystaý oblysynyń turǵyndary júginýde.
«Bul baǵytta kóshýge jaǵdaı jasaý boıynsha naqty jumystar júrgizilýde. Qyzyqty tetikterdiń biri – Jambyl oblysynyń tájirıbesi boıynsha kooperatıvter qurý múmkindigi bolady. Kooperatıvke kiretin barlyq adamdardyń belgili bir jeńildikteri, sonyń ishinde memlekettiń sýbsıdııalaýy, belgili bir tehnologııalardy satyp alý, belgili bir jeńildikti-kredıttik resýrstardy alýy bolady», dedi Eraly Toǵjanov Senatta tilshilerge bergen suhbatynda.
Sonymen birge E. Toǵjanovtyń aıtýynsha, qonys aýdarýshylardy qoldaý boıynsha taǵy bir áleýmettik shara – soltústikke kóshýge nıet bildirgender úshin AÁK mólsherin ulǵaıtý qarastyrylyp jatyr.
«Muny Parlamentke engizemiz dep oılaımyn. oltústikke kóshýge nıet bildirgender úshin ataýly áleýmettik kómek mólsheri ulǵaıýy múmkin. Bul usynys talqylanyp jatyr, ony Eńbek jáne áleýmettik qorǵaý mınıstrligine engizdik.
Bilim mınıstrliginiń «Serpin» baǵdarlamasy, «Bala - shaǵamen soltústikke» jobasy bar. Áleýmettik kodeks aıasynda da jobalar talqylanady», dedi Eraly Toǵjanov. Onyń aıtýynsha, qonys aýdarýshylarǵa áleýmettik qoldaý kórsetý sheshimdi jyl sońyna deıin qabyldanýy múmkin.
