Kezdesý barysynda 5 maýsymǵa belgilengen jalpyhalyqtyq referendýmnyń taqyrybyn túsindirý, sondaı-aq elimizdiń Negizgi Zańyna engiziletin túzetýler men tolyqtyrýlar týraly áńgime boldy. Aqmola oblysy boıynsha referendýmdy qoǵamdyq qoldaý respýblıkalyq shtaby ókildiginiń basshysy, «Aqmola oblysynyń ákeler keńesi» QB tóraǵasy Erlan Zakırıanov jáne Aqmola oblysy aýmaqtyq kásipodaqtar birlestiginiń tóraǵasy Qalı Rahmetov basqosý kezinde saıası naýqannyń tarıhı mańyzdylyǵyn atap ótti.
Shtab músheleri respýblıkalyq referendýmnyń negizgi máselelerine, sondaı-aq Ata Zańǵa engiziletin túzetýler men tolyqtyrýlar týraly, atap aıtqanda, Prezıdenttiń ókilettigin qysqartý, Parlament pen máslıhattardyń rólin kúsheıtý, azamattardyń memlekettik basqarýǵa qatysýyn keńeıtý, quqyq qorǵaý salasyn nyǵaıtý máselelerine keńinen toqtaldy.
«Konstıtýsııaǵa engiziletin túzetýler men tolyqtyrýlar Qazaqstan tarıhynda jańa taraýdy ashady, al memlekettiń saıası júıesin qaıta iske qosýdyń órshil maqsattary qoǵam men el ómirine jan-jaqty áser etedi», dep atap ótti spıkerler.
Kezdesý barysynda seriktestik qyzmetkerleri ózderin qyzyqtyrǵan suraqtaryn qoıyp, olarǵa tıisti túsiniktemeler men jaýaptar berildi. Is-shara sońynda «Gormolzavod» JShS ujymy usynylǵan ózgeristerge qoldaý bildirip, referendýmǵa qatysýǵa daıyn ekendikterin aıtty.
Esterińizge sala keteıik, Memleket basshysy «2022 jylǵy 5 maýsymda respýblıkalyq referendým ótkizý týraly» Jarlyqqa qol qoıǵan kúnnen bastap oblysta bilikti zańgerler, onyń ishinde ádilet, sot júıesi ardagerleri, saıasattanýshylar, qoǵam qaıratkerleri, qoǵamdyq pikir kóshbasshylarynyń basyn biriktirgen referendýmdy qoǵamdyq qoldaý respýblıkalyq shtab ókildigi qurylǵan bolatyn. Sol ýaqyttan beri respýblıkalyq shtab ókildigi óńirdiń ár aýdan, aýylynda jan-jaqty túsindirý jumysyn júrgizip keledi. Júrgizilgen jumys nátıjesinde búgingi kúni shtab 40 myń adamdy qamtı otyryp, myńnan astam is-shara ótkizdi.
