Saýyr-Saıqannyń etegin en jaılaǵan Zaısan aýdanynda 7 mektep ǵımaraty kúrdeli jóndeýden ótkizilse, odan bólek jyl saıyn 7-8 mektepke aǵymdaǵy jóndeý jumystary júrgiziledi. Bir ereksheligi, aýdannyń jeti mektebiniń jylý qazandyqtary gazǵa aýystyryldy. Synyp kabınetterin jańǵyrtý, zamanaýı qural-jabdyqtarmen jabdyqtaýda mektep túlekterimen, ardager ustazdarmen birlesken qaıyrymdylyq jumystary aýdan mektepterinde júıeli túrde júrgiziledi. Nátıjesinde, bilim berýde eńbek sińirgen ustazdar atyna 53 kabınet ashylyp, oqýshylar ıgiligine usynylǵan.
– Zaısan qalasynda kópbalaly otbasylarǵa memleket tarapynan úı berilgendikten, mektep oqýshylarynyń sany artty. Sol úshin de sapaly jalpy orta bilim berýdi qamtamasyz etý maqsatynda Saýyr shaǵyn aýdanynda 300 oryndyq zamanaýı úlgidegi mekteptiń qazyǵy qaǵyldy. Sátti aıaqtalsa, mektepti 2023 jyly beriledi dep josparlap otyrmyz, – deıdi aýdan ákiminiń orynbasary Serik Tlemesov.
Saýyr shaǵyn aýdanynda jańa mektep boı kóteretin bolsa, «Sıfrly Qazaqstan» baǵdarlamasy aıasynda jalpy aýdandaǵy mektepter sıfrly tehnologııaǵa aýysyp jatyr. 11 tolyq jınaqty jáne 1 shaǵyn jınaqty mektepte robottehnıka kabıneti, 15 shaǵyn jınaqty mektepte IT kabıneti jumys isteıdi. 27 mektep, 17 balabaqsha, 2 qosymsha bilim berý mekemeleri ınternet jelisine 100 paıyz qosylǵan.
– Qazirgi zamanda ınternettiń aýadaı qajet ekenin pandemııa jyldarynda shyn túsindik. Mektepterdiń barlyǵyna derlik ınternet tartylǵandyqtan asa qıyndyq kóre qoıǵan joqpyz. Sonymen qatar IT kabınetter jumys istep tur. Oqýshylar sıfrly zaman talabyna saı bilimderin alyp otyr, – deıdi pikir bildirgen M.Dáýlenov atyndaǵy mektep-ınternatynyń fızıka pániniń muǵalimi Almagúl Isabekova.
Al H.Mýstafına atyndaǵy mektep bazasynda 2016 jyly mektep-lıseıi ashylyp, daryndy 343 oqýshynyń jaratylystaný-matematıkalyq baǵytynda tereń bilim alýyna jaǵdaı jasady. Sol jyly aýdan mektepterinde sport synyby, kadet synyby, mektepaldy daıarlyq zııatker synyby jáne «Ertóstik» balabaqshasynda valeologııalyq top jumysyn bastady. Sondaı-aq 2019 jyly M.Lomonosov mektebinde kadet synyby ashylyp, Táýelsiz eldiń qorǵany bolatyndaı patrıot azamattar tárbıe alyp jatyr.
– Aýdannyń bilim salasyndaǵy atqaryp jatqan jumystaryn biz jaqsy bilemiz. Oqýshylar ár túrli saıystarǵa qatysyp, júldeli oralyp jatqandaryn da kórip, qýanyp otyramyz. Saýyr shaǵyn aýdanynda jańa mekteptiń qurylysy bastalatynyn estigende, qýanyshymyz eki eselendi, – deıdi alty balanyń anasy Tatıana Rodıonova.
Aıta keterligi, Zaısan aýdanynda Táýelsizdik jyldary 11 mektep, 17 balabaqsha, 14 shaǵyn ortalyq ashylǵan eken. Jekemenshik balabaqshalardyń úlesi jyl saıyn artyp, búginde onǵa jetip, 58,8 paıyzyn qurap otyr.
Shyǵys Qazaqstan oblysy,
Zaısan aýdany
