Nesıelendirýdi bastady

«QazAgro» ulttyq basqarýshy holdınginiń enshiles kompanııasy – Aýyl sharýashylyǵyn qarjylaı qoldaý qory – «Eginjaı» baǵdarlamasy boıynsha agroónerkásip kesheni sýbektilerine kóktemgi dala jumystaryna nesıeler bere bastady. Baǵdarlama 2010 jyly ashylyp, shaǵyn jer telimderi bar fermerlik sharýashylyqtar, sharýa qojalyqtary, jeke azamattardy qol­daýǵa baǵyttalǵan. Úsh jyldyń ishinde Aýyl sharýashylyǵyn qarjylaı qoldaý qory 2,7 mlrd. teńgege 1 myńnan astam jobany óz qara­jatynan qarjylandyrdy. Sonymen qatar, tartylǵan qarajattan maqta ósiretin aýylsharýashylyq taýar óndirýshilerine «Yrys» shaǵyn nesıe uıymy arqyly 1 mlrd. teńge bólindi. AО́K sýbektilerin qoldaý kelesi talaptarmen júzege asyrylýda: nesıeniń somasy 6 mln. teńgege deıin bolsa, jyldyq syıaqy ústemesi – 9,5%, tıimdi syıaqy ústemesi 10,2%-ǵa deıin. Nesıeni qaıtarý eki astyqty satýdan keıin qarastyrylǵan, bul aýylsharýashylyq taýar óndirýshileri úshin óte mańyzdy jeńildik. Qazaqstannyń ońtústik aımaqtaryndaǵy sharýalar jaqyn arada egis naýqanyn bastaýǵa daıyn. Qordyń Ońtústik Qazaqstan fılıaly «Eginjaı» baǵdarlamasy boıynsha naýryzdyń birinshi kúnderi 8,5 mln. teńgege 2 jobany qarjylandyryp, taǵy 2 ótinimdi qarastyrýda. Aǵymdaǵy jyly oblysta kóktemgi-dala jáne kúzgi jıyn-terim jumystaryna 50 mln. teńge baǵyttalady dep josparlandy. Jalpy, 2014 jyly Aýyl sharýashylyǵyn qarjylaı qoldaý qory tarapynan kóktemgi-dala jáne kúzgi jıyn-terim jumystaryna 1,6 mlrd. teńge bólinedi dep josparlanǵan. «Aýyl sharýashylyǵyn qarjylaı qoldaý qory» aksıonerlik qoǵamy – «QazAgro» Ulttyq basqarýshy holdıngi» AQ quramyna kiretin mamandandyrylǵan qarjy-nesıe­lik uıym bolyp tabylady. Qazaqstan Res­pýb­lıkasy Qarjy naryǵyn jáne qarjy uıymdaryn retteý men qadaǵalaý agenttiginiń banktik qaryz operasııalaryn júzege asyrýǵa lısenzııasy bar. Qordyń negizgi mindeti – qarjylyq qyzmetter men resýrstarǵa aýyl turǵyndarynyń qoljetimdiligin arttyrý. «Egemen-aqparat».