Jerlesterimizden sońǵy bolyp kortqa Elena Rybakına (jekeleı) men Aleksandr Býblık (juptyq) shyqty. Byltyrǵy «Rolan Garrostyń» shırek fınalyna deıin jetken Qazaqstannyń áıelder arasyndaǵy birinshi, álemniń 16-raketkasy Elena Rybakına bıyl úshinshi aınalymnan árige asa almady. Álemdik reıtıngtegi ornyna saı Fransııa ashyq chempıonatynyń 16-raketkasy bolyp tirkelgen qazaqstandyq tennısshi bastapqy básekede dúnıejúzilik reıtıngte 78-orynda turǵan nıderlandtyq Arancha Rýspen kezdesip, úsh sette – 6:1, 7:5, 6:2 esebimen basym túsken-di. Osyǵan deıin eki tennısshi ózara bir ret oınap, onda tájirıbeli Rýs jeńiske jetken bolatyn. Bul joly Elena Rybakına ese qaıtara bildi.
Ekinshi aınalymda jerlesimiz reıtıngte 135-orynda turǵan 20 jastaǵy amerıkalyq Ketı Volynespen sheberlik baıqasty. Bul olardyń ózara birinshi kezdesýi edi. Birinshi partııa sońyna taman E.Rybakına breık jasap, tarazy basyn ózine aýdardy – 6:4. Ekinshi sette qarqynyn tipti údetip, qarsylasyna birde-bir geım bergen joq – 6:0. Bir saǵattan astam ýaqytqa sozylǵan báseke barysynda qazaqstandyq sportshy esh qıyndyqsyz úshinshi aınalymǵa joldama aldy.
Alaıda úshinshi aınalymda reıtıngte ózinen keıin (22-oryn) ornalasqan amerıkalyq Medıson Kızge shamasy jetpedi. E.Rybakına birinshi partııada breık jasap, 6:3 esebimen jeńiske jetkenimen, ekinshi sette qarsylasy basymdyqty óz qolyna alyp, 6:1 nátıjesimen ese qaıtardy. Úshinshi, sheshýshi partııada esep 4:3 bolǵan mezette qazaqstandyq sportshynyń breık jasaıtyndaı múmkindigi boldy. Biraq taı-breıkte jeńis amerıkalyqtyń enshisinde ketti – 7:6 (10:3).
Al jekeleı synǵa qaraǵanda, juptyq básekede táýir óner kórsetken Aleksandr Býblık te shırek fınalǵa shyǵa almady. Aýstralııalyq Tanası Kokkınakıspen birge jup quraǵan Býblık alǵashqy aınalymda amerıkalyq Natanıel Lammons pen polshalyq Kamıl Maıhshakpen kezdesti. Qazaqstandyq-aýstralııalyq jup birinshi partııada 7:5 esebimen basymdyq tanytsa, ekinshi sette taı-breıkte jeńisti julyp aldy – 7:6 (7:5). Ekinshi aınalymda majarstandyq Marton Fýchovıch pen amerıkalyq Frensıs Tıafo jubymen oınap, qarsylastarynan eki sette – 6:4, 6:3 esebimen esh qıyndyqsyz basym túsip, úshinshi aınalymǵa shyqty.
О́kinishke qaraı, Aleksandr Býblık pen Tanası Kokkınakı French Open týrnıriniń shırek fınalyna joldama berýshi matchta utylyp qaldy. Qazaqstandyq-aýstralııalyq jup bul kezeńde Ivan Dodıg (Horvatııa) pen Ostın Kraıchekke (AQSh) eki sette – 3:6, 2:6 esebimen jol berdi.
Erler arasyndaǵy Qazaqstannyń birinshi raketkasy A.Býblık jekeleı synnyń alǵashqy aınalymynda dúnıejúzilik reıtıngte 68-orynda turǵan fransııalyq Artýr Rınderknehpen sheberlik baıqasyp, 6:2, 6:4, 6:4 esebimen jeńiske jetti. Buǵan deıin qarsylastar ózara eki ret kezdesip, ekeýinde de fransııalyq sportshynyń mereıi ústem bolǵan edi. Býblık osylaısha jeke kezdesýdiń esebin qysqartty. Degenmen qazaqstandyq tennısshi ekinshi aınalymda álemniń 31-raketkasy serbııalyq Mıomır Kechmanovıchten aılasyn asyra almady. Asa tartysty ótken kezdesýde serbııalyq tennısshi birinshi sette Býblıkke ese jibergenimen (6:4), qalǵan úsh sette basym boldy – 5:7, 2:6, 1:6.
Sondaı-aq jekeleı básekede óner kórsetken úshinshi tennısshimiz Iýlııa Pýtınseva da ekinshi aınalymnan keri qaıtty. Álemniń 37-raketkasy birinshi aınalymda dúnıejúzilik reıtıngte 112-orynda turǵan, negizgi jarysqa irikteý saıystarynan keıin qosylǵan rýmynııalyq Irına Baramen kezdesip, qarsylasyn eki sette – 6:3, 6:1 esebimen tize búktirgenimen, ekinshi aınalymda álemniń 30-raketkasy ıtalııalyq Kamıla Djordjıden jeńildi – 3:6, 5:7.
Qazaqstannyń juptyq syndaǵy birinshi, álemniń 20-raketkasy Anna Danılına da qazaqstandyq jankúıerlerdiń senimin aqtaı almady. Brazılııalyq Beatrıs Haddad Maııamen jup quraǵan ol alǵashqy aınalymda japonııalyq Erı Hodzýmı men Makoto Nınomııany 4:6, 6:4, 6:4 esebimen tize búktirgenimen, Danılına men Maııa ekinshi aınalymda taıbeılik Latısha Chan men aýstralııalyq Samanta Stosýrdyń synynan óte almady – 3:3, 2:6.
Sonymen qatar Qazaqstannyń juptyq syndaǵy birinshi (erler), álemniń 21-raketkasy Andreı Golýbev ekinshi aınalymnan asa almady. Ol fransııalyq Fabrıs Martenmen birge dodanyń 16-raketkalary úndistandyq Rohan Bopanna – nıderlandtyq Matve Mıddelkopqa jol berdi – 3:6, 4:6.
