Ekologııa mınıstrliginiń ókilderi BQO-ǵa is-saparmen bardy. Onda Jánibek aýdanynyń jergilikti sharýalarymen kezdesti. Jıynda sońǵy jyldary kóbeıgen kıik máselesi kóterildi. О́ıtkeni Oral popýlıasııasyndaǵy kıikterdiń sany 800 myńnan asqan. Turǵyndar tórt túliktiń jaıylymynda kógal qalmaıtynyn aıtady.
«Kıikterdiń kóptiginen biz sharýalar japa shegip jatyrmyz. Jaıylymǵa mıllıonǵa jýyq kıik kelse, ol jerde eshqandaı shóp qalmaıdy. Bulardyń sany aıtarlyqtaı kóp. Qalaı da azaıtý kerek», dedi BQO Jánibek aýdany Kúıgen kól aýylynyń turǵyny Boranbaı Aıtqalıev.
Ekologııa mınıstriniń orynbasary Álııa Shalabekova kıikterdi aýlaý úshin bıologııalyq negizdeme kerektigin aıtady. Degenmen, osy máselege qatysty mınıstrlik tıisti jumystardy júrgizip jatyr. Sondaı-aq, jıynda vıse-mınıstr shilde aıynan bastap osy óńirde erekshe qorǵalatyn tabıǵı aýmaqtar qurylatynyn aıtady. Osy arqyly Oral popýlıasııasyndaǵy kıiktiń 250 myńǵa deıin basyn atalǵan aýmaqta ustap turý kózdelmek.
«Búgingi tańda respýblıkalyq mańyzy bar erekshe qorǵalatyn tabıǵı aýmaqtar qurý týraly qaýly shyqty. Tabıǵı aýmaqtyń aýdany 314504,1 gektardy, rezervatynyń aýdany 343040,1 gektardy quraıdy. Batys Qazaqstan oblysynyń Bókeı ordasy, Jánibek, Kaztalov, Jańaqala aýdandarynyń aýmaǵynda ornalasatyn bolady. Munda kıiktiń 250 myń basyna deıin saqtalady», dedi Ekologııa, geologııa jáne tabıǵı resýrstar vıse-mınıstri Álııa Shalabekova.
Aıta ketsek, Qazaqstan aýmaǵynda Betpaqdala, Oral jáne Ústirt sııaqty kıikterdiń álemdik popýlıasııasynyń 95%-dan astamy mekendeıdi.
Eske salsaq, 2016 jyly elimizde jalpy kıiktiń sany 100 myńnan sál asqan. Tabıǵat saqshylarynyń júıeli jumysynyń nátıjesinde qazir olardyń sany bir mıllıon bes júz myńǵa jýyqtaǵan.
