Bilim jáne ǵylym mınıstri Ashat Aımaǵambetov tıisti buıryqqa qol qoıdy.
«Halyqaralyq olımpıadalardyń, sporttyq jáne shyǵarmashylyq baıqaýlardyń tizbesin bekitý týraly buıryqqa qol qoıdym. Búgin Bilim jáne ǵylym mınıstrligi Dúnıejúzilik gımnazıada – 2022-niń jeńimpazdary men júldegerlerin marapattaý rásimin ótkizedi. Oqýshylarymyz álemniń 70-ten astam elinen kelgen jasóspirimderdi basyp ozyp, 86 medal jeńip aldy. Osylaısha ulttyq quramamyz III oryndy ıelengen bolatyn. Endi olar birinshi bolyp JOO-da oqý úshin granttar alady. Jas daryndar Memleket basshysynyń sheshimi arqasynda osyndaı qoldaýǵa ıe bolyp otyr», dep jazdy mınıstr áleýmettik jelidegi paraqshasynda.
