Dos týraly sóz

Asyl azamat Aqjoltaı Mámbetálıev aramyzdan ketkeli bir jyl ýaqyt ótti

AQJOLTAI!!! Sen týraly ótken shaqta sóıleýge aýyz barmasa da Allanyń ámirine amalymyz qaısy? О́zińsiz tuzy kem taǵamdaı bir jyldy da ótkerdik, baýyrym! Qanatyńdy keńge jaıyp qyran qustaı qalyqtap, qamshy saldyrmaı, kósile shapqan taza qandy qazanattaı sharyqtap kele jatqan arǵymaq-arynyńnyń kilt úzilgenine ókinip, kókiregimdi munar muń basady. Sen óte kópshil, barshaǵa ortaq,  jeke-dara Aqjoltaı ediń ǵoı. Adamǵa jaqyn, kisige  ju­ǵymdy, qashan da jarqyraǵan juldyzdaı, aıtýly da aptal azamat bolatynsyń. Jumyr bas­ty pendeniń boıynda qandaı izgilikti de parasatty qasıet bolý kerek bolsa, sonyń bári sende bar edi. Sol úshin sen meniń ǵana emes, ózińdi syılaıtyn árkimniń júreginiń tórindegi jekemenshik Aqjoltaıysyń. «Meniń» dep menshiktegenim de sondyqtan. Ekeýmiz de qarapaıym sharýa otbasynyń ulandary bolsaq ta, ustazdarymyzdyń tálimin ala júrip, bir-birimizdi tárbıeleppiz. Men aýyldyq mekteptiń qatar­daǵy muǵalimi, sen aýdandyq aýrýhananyń qatardaǵy otashy dárigeri bolyp júrgende-aq: Kóresiń, biz óz salamyzdyń aýdandyq basshysy bolamyz, – deıtinsiń.  Meniń oıym túgili sanamda dym joq. Bos qııaldaı eles­tep,  kúlem de qoıam. Sóıtsem sen  asqan suńǵyla ekensiń. Boljamyń dál keldi. Qyzmet satysynda bir-birimizdi  úırete júrip úırendik. Aýdannyń bas dárigeri  bolyp bekitilgennen keıin abyroıyń da asqaqtap, elge keńinen tanymal boldyń. Azamattyq turǵydan qoǵamǵa belsene aralasýyńnyń arqasynda qaıratkerlik dárejege de qol jetkizdiń. Qatarynan úsh márte Almaty oblystyq más­lıhatynyń depýtaty bolyp saılanǵanyńda, eki márte senimdi ýákiliń bolyp, qýanyshpen qul­shyna  qoshamettep, janyńda júrdim. Ǵumyr boıy oryssha oqyp kelseń de qazaqı tárbıeniń tamyryn, halqymyzdyń baı dástúrin 100 jastan  asyp ómir súrgen, táýip-emshi Toqbala ájemizdiń arqasynda boıyńa sińirgen azamat ediń. Syrqattarǵa sózińmen  shıpa berip, darynyńmen daýalaı biletinsiń. Kóńili pás jandarǵa tótennen kelgen Qyzyr babadaı áser qaldyratynsyń. Aqtamda tursam da, Almatyda tursam da arajigimiz ajyramaı shırek ǵasyrdan astam kóńi­limizge kirbiń túsirmeı, kisili­gimizdi kirletpeı aınymas dos bolyp­pyz. Sońǵy bes jylda ekeýmiz eki qıyrda júrsek te baılanysymyzdy úzbeı, neshe túrli joldarmen adamdy ózińe qaraı tartyp alatyn qudiretińmen «Aqyldy bol!» dep aıaqtar ádemi, ázildi únińdi de ańsattyń! Búginde qalta telefonda aıaý­ly atyńdy áli saqtap júrmiz. Sońǵy jazǵan sózderińe deıin óshirýge qol barmaıdy. Seniń ár qyryń men syryńdy aıtyp, taýysý múmkin emes. Eger sen dáriger bolmaı ánshi bolsań – kúmis kómeı, jeztańdaı, akter bolsań – asqan sańlaq, sportshy bolsań – top jarǵan, muǵalim bol­sań – ozyq oıly, ulaǵatty  ustaz bola alatyndaı asa daryndy ediń. Musylmandyq paryz ben halqymyzdyń salt-dástúrin de tereń meńgergen Sen bizdi adastyryp, aýyrtyp ketseń de  óziń aıta beretin: «О́mir bar jerde ólim bar» degen qaǵıdany qatal da bolsa moıyndaısyń. Janyńda júrgen jaqsy kisilerdi joǵaltqanda j­a­nyń aýyryp, júregiń syzdaı­dy. Basqa túsken kez kelgen aýyrt­pa­lyqty, onyń ishinde qazany shúkir­shilikpen kóterý kerek. Bul támsil sharıǵatta da qadap aı­tyl­ǵan» – deıtin aqyldy sózińe toqtalamyz. Dostyq paryzdy aqtaý – úl­ken mindet. Tirligińde sol paryz­dy múltiksiz atqarǵan  sen – júre­gimizdegi máńgilik aǵyl-tegil saǵy­nyshsyń, aldyń aq jaılaý – jampozym, aı mańdaıly – Aqjol­taıym – Aıbozym!  Peıishten nuryń shalqyp, mingeniń – pyraq, usta­ǵanyń shyraq bolsyn, jan dosym! Máńgilik rýhyńa taǵzym etýshi dostaryń men jaqyndaryńnyń atynan Nurmuqa Rysbaıuly ShÁIMERGENTEGI.