«Rolan Garrosta» qansha tabys tapty?

Bıylǵy dodaǵa qatysqan ten­nıs­shilerimizdiń bári de «Úl­ken dýlyǵa» sanatyndaǵy jyl­dyń ekinshi iri týrnırinde úzdik­ter sanatynan kórinbese de, birshama materıaldyq jaǵdaıyn jaq­sartyp aldy. Máselen, elimiz­diń áıelder arasyndaǵy birinshi raketkasy Elena Rybakına ja­rystyń úshinshi aınalymyna jetkeni úshin 133,5 myń eýro (62,3 mıllıon teńge) kóleminde syıaqy aldy. Alaıda ol byl­tyrǵy jetistigin qaıtalaı alma­ǵandyqtan, aldaǵy aptada jańa­ratyn álemdik reıtıngte TOP-20 tennısshiniń qatarynan shyǵyp qalaıyn dep otyr. 2021 jylǵy dodada ol shırek fınalǵa deıin jetken bolatyn.

Sondaı-aq E.Rybakına jup­tyq synda da byltyrǵy jetistigi men ıelengen upaıyn qorǵaı almady. Byltyr juptyq básekede de shırek fınalǵa deıin jetken otandasymyz bıyl alǵashqy aınalymda súrindi. «Rolan Garrosqa» deıin juptyq reıtıngte 48-orynda turǵan Elena endi TOP-60 ten­nısshiniń qataryna jaıǵasýy múmkin.

Fransııa ashyq chempıona­ty­nyń irikteý jarysyna qatys­qan Zarına Dıas birinshi aına­lym­da jeńilip, reıtıngtegi jaǵ­daıyn odan ári nasharlatyp aldy. Jarysqa deıin 128-orynda turǵan jerlesimiz jańarǵan reıtıngte 20-30 saty tómen syr­ǵıtyn boldy. Degenmen ol týr­nırge qatysqany úshin 14 myń eýro (6,5 mıllıon teńge) kóle­minde tabys tapty.

Iýlııa Pýtınseva negizgi ke­zeń­niń ekinshi aınalymynda utylsa da, reıtıngtik upaıyna qol jetkizdi. Sebebi ol byl­tyr­ǵy týrnırde alǵashqy aınalymda jarysty aıaqtaǵan bolatyn. Iý.Pýtınseva ekinshi aına­lymǵa shyqqany úshin uıym­dastyrýshylar tarapynan 93,75 myń eýro (43,7 mıllıon teńge) syıaqy aldy.

Juptyq básekede Qazaq­stan­nyń birinshi raketkasy Anna Danılına da jýyrda jańaratyn reıtıngte TOP-10 tennısshiniń qataryna jaqyndaı túspek. Jup­tyq básekede synǵa túsetin jerlesimiz «Rolan Garros» týr­nıriniń ekinshi aınalymynda súrinse de, negizgi kezeńge bıyl alǵash ret qatysqandyqtan, ol úshin bul joǵary nátıje bolyp esepteledi. A.Danılına osy jetistiginiń arqasynda 15 myń eýroǵa (7 mıllıon teńge) qol jetkizdi.

Erler básekesindegi qazaq­standyq tennısshilerdiń nátı­jesine toqtalar bolsaq, jigit­terimiz reıtıngte óz oryndaryn saqtap qalady. Sebebi Aleksandr Býblık byltyrǵydaı ekinshi aınalymnan keri qaıtty. Nátıjesi turaqty bolǵandyqtan, odan upaı alynbaıdy jáne upaı berilmeıdi. Jup­tyq synda sátsiz óner kór­setip, byltyrǵy jetistigin qaı­talaı almaǵandyqtan, A.Býb­lık pen Andreı Golýbev juptyq reıtıngte tómendeıtin boldy. Býblık bir aptalyq oıyny úshin 109,5 myń eýro (51,1 mıllıon teńge) ta­bys tapsa, Golýbev 15 myń eýro (7 mıl­lıon teńge) syıaqyǵa ıe boldy.

Irikteý saıystaryna qatysqan Tımofeı Skatov (20 myń eýro nemese 9,3 mıllıon teńge) pen Dmıtrıı Popko 14 myń eýro (6,5 mıllıon teńge) oljalady. Son­daı-aq Aleksandr Nedovesov 7,75 myń eýrony (3,6 mıllıon teńge) qaltasyna basty. Sóıtip, bıylǵy dodaǵa qatysqan qazaqstandyq tennısshiler jalpy somasy – 422,5 myń eýro (197,2 mıllıon teńge) syıaqyǵa ıe boldy.

Aıta keteıik, bıylǵy «Rolan Garros» týrnıriniń jalpy júlde qory – 43,6 mln eýrony (23 mıllıard teńge) quraıdy. Bul – ázirge osy týrnırdiń rekordtyq aqshalaı júldesi. Aldaǵy jek­senbi kúni máresine jetetin jarysta top jarǵan tennısshi 2,2 mln eýro men 2 000 reıtıngtik upaıy­na ıe bolady.