Bitirý emtıhandary, túlekterdi bólý jáne azamattardy áskerı oqý oryndaryna qabyldaý kezeńinde sybaılas jemqorlyqtyń aldyn alý máseleleri boıynsha áskerı oqý oryndarynyń basshylaryn tyńdady.
Qorǵanys mınıstriniń orynbasary professorlyq-oqytýshylar quramyn irikteý jáne ornalastyrý kezinde olardy qabiletine qaraı qabyldaý erejesin qoldanýǵa nazar aýdardy. Bul bilim men ǵylym salasyndaǵy sybaılas jemqorlyqqa yqpal etetin faktorlardyń kórinisin joıýǵa kómektesedi.
Komıssııa tóraǵasy áskerı oqý oryndarynyń bastyqtaryna azamattardy qabyldaý kezinde áskerı polısııa ókilderiniń qatysýymen, talapkerlerdiń ata-analarymen kezdesýlerde qabyldaý komıssııasynyń jumys tájirıbesin beınebaqylaýdy qoldana otyryp zerdeleýdi usyndy.
General-leıtenant Sultan Qamaletdınov Qorǵanys mınıstrligi Kadrlar departamentiniń basshysyna: «Kadrlyq quramnyń sapasyn jaqsartý maqsatynda laýazymdy tulǵalardy irikteýdiń ashyqtyǵyn arttyrýdy qamtamasyz etetin áskerı qyzmetshilerdi irikteý jáne olardy kásibı turǵyda daıarlaý ádistemelerin jetildirý jóninde usynystar engizińizder», degen tapsyrma qoıdy.
Sonymen birge Qorǵanys mınıstriniń orynbasary shamadan tys bıýrokratııa máselelerin sheshý jáne kadrlyq prosesterdi avtomattandyrý qajet ekenin aıtty. Ol kandıdattardyń áskerı qyzmetke kirýi úshin tıisti qujattardy jınaý men usynýdyń, olardy qaraýdyń, zerdeleý men tekserýdiń naqty merzimderin belgileýdi, sondaı-aq áskerı qyzmet ótkerý erejelerin qaıta qaraýdy tapsyrdy.
2022 jylǵy 15 sáýirde «Áskerı qyzmet jáne áskerı qyzmetshilerdiń mártebesi týraly» zańǵa áskerı qyzmette jaǵymsyz áreketter jasaǵany úshin kir keltiretin jáne teris qylyqtarymen áskerı qyzmetten bosatýdy kózdeıtin áreketterdi qarastyratyn tolyqtyrýlar engizilgen bolatyn.
Bul tizimge qyzmet babyn jeke basyna paıdalaný, kásipkerlik qyzmettiń kez kelgen túrimen, onyń ishinde kommersııalyq deldaldyqpen aınalysý, qyzmet babyn paıdalana otyryp, jumystar oryndaý jáne qyzmet kórsetip, sol úshin syıaqy alý jatady.
Odan ózge otyrysta qyzmettik turǵyn úılerdi bólý jáne janar-jaǵarmaı materıaldar qyzmetin uıymdastyrý kezindegi jemqorlyq táýekelderi de qaraldy.
Osy tarmaqtar boıynsha turǵyn úıge muqtaj áskerı qyzmetshiler úshin qyzmettik páterlerdi bólý máselesin baqylaýǵa alý jáne vedomstvolyq turǵyn úılerde zańsyz turyp jatqandarǵa tekserý júrgizý tapsyryldy.
Janar-jaǵar maı qyzmetine qatysty jemqorlyq jasap, quqyq buzýdyń aldyn alý úshin olardyń basshylaryn qyzmetke taǵaıyndaý kezinde polıgrafııalyq zertteý júrgizý usynyldy.
Qorǵanys mınıstrliginiń sybaılas jemqorlyqqa qarsy is-qımyl jónindegi komıssııasynyń tóraǵasy general-leıtenant Sultan Qamaletdınov laýazymdy tulǵalarǵa birqatar tapsyrma berdi. Ol sybaılas jemqorlyqqa qarsy is-qımyl jónindegi jumysta zań júzinde qaralǵan, onyń ishinde áskerı qyzmetke kir keltiretin teris qylyqtar úshin tártiptik praktıkany qoldaný jónindegi jańa engizilgen tarmaqtardy negizge alýdy tapsyrdy.
