Júldege ilige almady

Úsh aptaǵa sozylǵan básekede veloshabandozdar Majarstan men Slovenııanyń shekarasyn kesip ótip, Italııadaǵy jarys kezeńderin qosa eseptegende, jalpy uzaqtyǵy 3445,6 shaqyrym joldy artta qaldyrdy. Sondaı-aq sportshylar osy aralyqta bıik­tigi 50 shaqyrymǵa deıin je­tetin Etna, Blokhaýs, Mor­tırolo, Pordoı, Fedaııa sııaqty taýly kezeńderdi de baǵyndyrdy.

Bıyl 105-shi márte uıym­dastyrylǵan «Djıro d’Italııa» dodasy Majarstanda jalpy kezeńmen bastalyp, jekeleı jarys kezeńimen máresine jetti. Verona qalasynyń 4-sanattaǵy bıik shyńymen ótken sońǵy jarys kúninde 25 jastaǵy Italııa chempıony Matteo Sobrero (Bike­Exchange – Jayco) jeńimpaz atandy. Ol 17,4 shaqyrym qa­shyq­tyqty 22 mınýt 24,54 sekýndta ortasha 46.588 km/saǵ jyl­damdyqpen júrip ótti. Máre sy­zyǵyn jeńimpazdan 15 sekýnd keıin kesken Team DSM velo­komandasynyń ókili Tımen Arensman (Nıderland) ekinshi orynǵa ıe bolsa, taǵy bir nıder­landtyq veloshabandoz Mate van der Pýl (Alpecin-Fenix) úshinshi orynǵa taban tiredi. Ol Mat­teo Sobre­rodan 33 sekýndqa qa­lyp qoıdy.

BikeExchagne-Jayco velo­ko­­man­dasynyń ókilderi bıyl­ǵy «Djıro d’Italııanyń» eki bir­deı jekeleı kezeńinde úzdik shyq­ty. Býdapeshtte 9 sha­qyrym­ǵa sozylǵan alǵashqy jekeleı ja­rys­­ta Saımon Ieıts top jarsa, kúni keshe Matteo Sobrero aldy­na jan salmady. Sondaı-aq S.Ieıts 14-kezeńniń jeńimpazy atandy.

Sońǵy kezeńdegi M.Sobre­ronyń jeńisi jalpy eseptegi úzdik úshtiktiń nátıjesine esh áser etken joq. 21 kezeńniń qo­rytyndysy boıynsha, bıylǵy «Djıro d’Italııa» dodasynda 26 jastaǵy aýstralııalyq Djeı Hındlı (Bora-hansgrohe) 86 saǵat 31 mınýt 14 sekýnd kórsetkishimen bas júldeni jeńip aldy. Bul onyń karerasyndaǵy tórtinshi «Djırosy» boldy. 9-shy eń bıik taýly kezeńde jeńimpaz atan­ǵan Hındlı 14-kezeńnen 19-kezeńge deıin jalpy esepte ekva­dorlyq Rıchard Karapasty (Ineos) ókshelep keldi de, sońǵy asa kúrdeli taýly 20-kezeńde ony shań qaptyryp, kóshbasshyǵa tıesili qyzǵylt jeıdesin kıdi. Al jalpy esepte ekinshi oryn­ǵa taban tiregen R.Karapas aýstra­lııalyqtan 1 mınýt 18 sekýndqa qalyp qoısa, úzdik úshtikti Djeı Hındlıden 3 mınýt 24 sekýnd utylǵan «Astananyń» eks-velo­shabandozy ıspanııalyq Mıkel Landa (Bahrain Victorious) qory­tyndylady.

Al qazaqstandyq «Astana» veloklýbynyń ókilderi arasynda eń úzdik nátıjege «Djıro d’Italııanyń» eki dúrkin je­ńim­pazy, 37 jastaǵy ardager ve­­loshabandoz ıtalııalyq Vın­chenso Nıbalı qol jetkizdi. Je­ńimpazdan 9 mınýt 2 sekýndqa qalyp qoıǵan Nıbalı jalpy esepte tórtinshi orynǵa turaq­tady. Astana Qazaqstan Team bas­shylyǵynyń áýelgi jospary boıynsha bıylǵy dodada Mıgel Anhel Lopeske senim artylyp, búkil koman­dalastary kolýmbııa­lyqtyń kóm­bege qaraı er­kin je­týi­ne múm­­kindik ja­saýǵa tıis edi. Alaı­­da Lopes «Djıro­nyń» 4-kezeńinde jaraqatyna baı­lanys­ty jarysty erte aıaqtaýǵa májbúr boldy. Sóıtip, koman­danyń bar jaýapker­shi­ligi Vın­chensoǵa júkteldi. Jarys bel ortaǵa taıaǵan tusta, ıaǵnı 9-kezeńde Nıbalı segizinshi oryn­ǵa taban tirese, 14-kezeńde júl­deli orynǵa bir saty qalǵanda toq­tady. Sóıtip, osy kezeńnen bastap ol jalpy eseptegi TOP-10 veloshabandozdyń qata­ryna qo­syldy. Odan keıin «As­tana» kapıtany 16-kezeńde besin­shi, 18-kezeńde tórtinshi orynǵa kó­terildi. Dúbirli doda aıaq­tal­ǵanǵa deıin Vınchenso sol ornyn saqtap qaldy.

Bıylǵy «Djıro d’Ita­lııa­nyń» jekeleı atalymdaryna toqtalar bolsaq, 30 jas­taǵy fran­sııalyq Arno Demar (Groupama-FDJ) karerasynda ekinshi ret upaı klassıfıkasııasynda top jarsa, 28 jastaǵy nıderlandtyq Kýn Baý­man (Jumbo-Visma) taýly kezeńiniń úzdigi atandy. Sondaı-aq Trek-Segafredo komandasynyń ıspanııalyq ókili Hýan Pedro Lopes jarystyń eń úzdik jas veloshabandozy ataǵyna ıe bol­dy. Bul synda 22 jastaǵy qa­zaqstandyq Vadım Pronskıı be­sinshi orynǵa turaqtady. Al Bahrain Victorious veloklýby ko­mandalyq jalpy esepte úzdik shyq­ty. «Astana» ujymy besinshi satyǵa jaıǵasty.