Týrnırdi uıymdastyrýshylardyń biri Marat Dáýitovtiń aıtýynsha, balalar arasynda úsh aıǵa deıin sozylǵan mundaı iri jarystar óńirde 2005 jyldan keıin ótpegen kórinedi. Sondyqtan bıyl birinshi ret jalaýyn kótergen mektep basketbol lıgasy oblystaǵy aıtýly oqıǵalardyń biri ekeni sózsiz.
Sport janashyrlary keleshekte atalǵan basketbol lıgasynyń aýqymy budan da keńeıe túsip, búkil oblys mektepterin qamtıtynyn aıtady. Jarysqa bıyl basketbol sporty jaqsy damyp kele jatqan Qostanaı men Rýdnyı mektepteriniń oqýshylary ǵana qatysyp otyr. Jas basketbolshylar aldymen ishki qalalyq jarystarda irikteý jarystarynda baq synasty. Odan súrinbeı ótken úzdik komandalar sýperfınalda kezdesti.
– Týrnırdi eki kezeńge bólip ótkizýge týra keldi. Aldymen Rýdnyıda, odan keıin oblys ortalyǵynda oıyndar ótti. Bıyl tuńǵysh ret uıymdastyrylyp otyrǵan mektep basketbol lıgasynyń qanatqaqty joba ekenin aıta ketý kerek. Bul joba aıasyndaǵy jarystardy kelesi oqý jyly erterek qolǵa alamyz. Qazan aıynyń ekinshi jartysynan bastap, 2023 jylǵy sáýirdiń ortasyna deıin aıaqtaýdy josparlap otyrmyz. Mektep basketbol lıgasynyń basty maqsaty – balalar arasyndaǵy jarystardyń júıeli ótip turýyn qamtamasyz ete otyryp, endi ǵana ósip kele jatqan talapker basketbolshylar arasyndaǵy ishki básekeni arttyrý. О́ıtkeni sportshynyń sheberligi joǵary báseke jaǵdaıynda ǵana shyńdalady, – deıdi Marat Dáýitov.
Oblystyq sport basqarmasyndaǵylardyń sózinshe, jarys óte bastaǵan úsh aıdyń ishinde oqýshylardyń sheberlik deńgeıiniń edáýir óskeni baıqalady, komandalardyń oıyn órnegi de aıshyqtala túsken. Bul oraıda mamandar deneshynyqtyrý muǵalimderiniń eńbegi orasan zor deıdi. Al týrnırdi bastan-aıaq baqylap shyqqan sarapshylar jarys barysynda balalardyń jaqsy oıyn tehnıkasyn, keıbir komandalardyń kezdesýde ábjil qımyldap, shapshań shabýyldap, taktıkalyq oıynnyń ozyq úlgisin kórsete bilgenin atap ótti.
– Aldymen mektep basketbol lıgasyn tıisti deńgeıde uıymdastyrýǵa qoldaý kórsetken Qostanaı jáne Rýdnyı qalalaryndaǵy bilim bólimderine shynaıy rızashylyq bildirgim keledi. Týrnırge qatysýshylarǵa estelik syılyqtar, dıplomdar men kýboktar satyp alyp, qarjylaı kómek kórsetken demeýshilerimizge de rahmet. Ol kisilerdiń orny qashanda bólek. Bıyl jarysqa qatysa almaǵan kóptegen bilim mekemesi endi bul týrnırge úlken qyzyǵýshylyq tanytyp otyr. Sondyqtan aldaǵy jyly jarysqa qatysatyn komandalardyń sany edáýir kóp bolady, – dedi Marat Dáýitov.
Mektep basketbol lıgasynyń sýperfınalynda 4-6 synyptar boıynsha qyzdar arasynda Qostanaı qalasyndaǵy №4 orta mekteptiń komandasy, al uldar arasynda Qostanaıdaǵy №1 mektep-lıseıdiń oqýshylary jeńimpaz atandy. 7-8 synyptar arasynda Rýdnyıdyń №5 gımnazııasy birinshi oryndy jeńip aldy. Al 9-11 synyptar arasynda eshbir komandaǵa des bermegen №5 Qostanaı qalalyq orta mektebiniń uldary men №29 orta mekteptiń qyzdary jeńis tuǵyrynan kórindi.
Qostanaı oblysy
