Bul oqýdy támamdaǵandar balalar men jasóspirimderge arnalǵan sport seksııalaryn júrgize alady. M.Nyǵymetovke osyndaı dıplom kerek bolǵan soń jasynyń ótkenine qaramaı balalarynan da kishi jastarmen qatar kúndizgi oqýdyń ústeline otyrǵan. Oqýshylar túgili mundaǵy muǵalimderdiń ózi – Mákeńniń balalaryndaı. Alǵash qujattaryn tapsyrýǵa kelgende shyny ma, ázili me dep senbeı, keıin oblystyq bilim basqarmasynan ruqsat alyp qabyldaǵan eken.
M.Nyǵymetovtiń áńgimesi senimdi, «adam jasyna qaramaı kez kelgen kedergini baǵyndyra alady, men sony dáleldemekpin» deıdi. Jasynan sporttyń kóptegen túrimen aınalysqan eken. Sonyń ishinde karateden qara belbeý ıesi atanypty. Bokspen, voleıbolmen, fýtbolmen de aınalysqan. «Úıimizdiń janyndaǵy stadıonnan kúni boıy shyqpaı, kez kelgen sport túrimen aınalysa beretinmin. Sol ádet ómirimde áli de qalmaı keledi. Qazir gir kóterýmen de aınalysamyn. 24 kılogramdyq eki girdi ár qolymmen 50 ret kótere alamyn», deıdi ol.
Jeke ómiri týraly Mákeń jarylyp aıta qoımaıdy. Tek Selınograd qalasynda týyp, áke-sheshesi ajyrasqan soń anasymen birge alty jasynan Petropavlǵa kóship kelip, turyp jatqanyn ǵana aıtty. Oqýdy eńserýi týraly aıtqan mektep-ınternat dırektorynyń orynbasary O.Ostafeıchýk úlgerimi jaman emes ekenin jetkizdi. Tek bıyl ǵana kóp sabaqty jibergeni úshin shákirtaqydan qaǵylypty.
Kolledjdi bitirgen soń M.Qozybaev atyndaǵy ýnıversıtettiń dene tárbıesi fakýltetine túsý oıy da bar eken. О́zi jasynyń ulǵaıyp qalǵanyn tipti aýyzǵa da almaıdy. Bári de oǵan áli alda sııaqty. Mine, Petropavlda osyndaı optımıst adam ómir súrip jatyr. Onyń isi úlgi me, joq pa, ony árkim ózinshe baǵalar, eń bastysy, ol jasqa qaramaı adam aǵzasynyń tózimdi bola alatynyn dáleldep jatyr.
PETROPAVL
