Abaı men Shákárim shyǵarmalaryn halyqtyń sanasyna sińire túsý, oqýshylardyń shyǵarmashylyq qabiletterin damytý maqsatynda ótkizilgen saıys 6 atalymnan turdy: «О́leń – sózdiń patshasy, sóz sarasy», «Abaıdyń qara sózderi» bólimderinde aqynnyń óleńderin, qarasózderin mánerlep, jatqa oqydy. «Abaıdyń aqyn shákirtteriniń shyǵarmalary» atalymynda Shákárim Qudaıberdiulynyń, Aqylbaı, Maǵaýııa Abaıuldarynyń shyǵarmalaryn oqyp saıysty. Al «Kóńilim ándi uǵady» bólimi saıystyń kórigin tipten qyzdyrdy. Oqýshylar Abaı men Shákárimniń ánderin, kúılerin oryndap kópshilikti tańdaı qaqtyrdy. «Júırikten júırik ozar, jarysqanda» deı-tuǵyn bólimde ónerli oqýshylar óz shyǵarmashylyqtaryn ortaǵa saldy. Al «Ulylar álemi» bóliminde Abaı men Shákárimniń shyǵarmashylyǵy, rýhanı bolmysy týraly esse jazysty.
Oqýshylardyń daıyndyǵy joǵary boldy ma, álde Abaıdyń topyraǵy tebirentti me, óleńdi de, qarasózdi de súrinbeı oqydy. Mátinniń mazmunyna qaraı daýystaryn birde kóterip, birde báseńdetip, myń qubyltty. Kórermen de berile tyńdady. Al Abaıdyń ánderi qulaqtan kirip, boıdy aldy. Esse jazýda da oqýshylar erekshe kózge tústi. Jazý stıli ózgeshe balalardyń bolashaǵynan zor úmit kútýge bolatyn sekildi.
– О́zim alǵash Abaı oqýlary bastalǵanda kórermeni boldym, ózim qatystym. Aıtaıyn degenim, Abaıdy, Shákárimdi jattap ósken balalar qazirgi tańda ómirde óz oryndaryn tapqan úlgili jastar. Iаǵnı qazirgi oqýshylardyń da bolashaǵy zor. Buryn respýblıkalyq Abaı oqýlary aqynnyń týǵan jerinde ótip kelgen. Al oblystyq kezeńi tuńǵysh ret Abaı aýdanynda uıymdastyryldy. Oqýshylardyń daıyndyqtary óte jaqsy. Biz úshin júldegerlerdi anyqtaý ońaı bolǵan joq, – deıdi ádilqazylar alqasynyń tóraǵasy Nurjan Baıtós.
Bul jolǵy Abaı oqýlarynyń ereksheligi, marapattaý rásimi Abaı-Shákárim kesenesindegi amfıteatrda uıymdastyryldy. Alty synnan súrinbeı ótken Jarma, Aıagóz, Tarbaǵataı, Shemonaıha aýdandarynyń jáne Rıdder qalasynyń oqýshylary qazylardyń joǵary baǵasyna ıe boldy. Al Glýbokoe aýdany M.Ǵabýllın atyndaǵy orta mektebiniń oqýshysy Gúlim Danııarǵa Abaı aýdany ákiminiń arnaıy syılyǵy tabystaldy.
Abaı oqýlarynyń qorytyndysy boıynsha 1-orynmen – 6 oqýshy, 2-orynmen – 12 oqýshy, 3-orynmen 21 oqýshy marapattaldy. Bir oqýshyǵa Abaı aýdanynyń ákimi alǵys hat pen syılyq tabystady. Jalpy júldegerlerge syılyqtar men dıplomdar tabys etildi. Al barlyq qatysýshylarǵa sertıfıkattar berildi.
Saltanatty is-sharadan soń oqýshylar Jıdebaıdaǵy Abaı mýzeıin aralap, sol zamanynyń rýhyn sezingendeı boldy. Ádebıetten, tarıhtan oqyǵan jerge aıaq basyp, kózben kórý – oqýshylar úshin baqytty sát. Tarıhı mekenge joldary túsken olar Eýrazııa kindiginde estelik fotoǵa tústi.
Shyǵys Qazaqstan oblysy
