Baıqaýdyń maqsaty – qazaqstandyq bankterge úzdik qarjylyq-tehnologııalyq ujymdarmen nátıjeli yntymaqtastyqty quryp, turaqty bankıngti damyta otyra ESG-táýekelderdiń (Ekologııalyq, áleýmettik jáne korporatıvtik basqarý saıasaty) keń spektrin basqarýǵa járdemdesý. Onyń basty baǵyttaryna qarjylyq ınklıýzıvtilik, atap aıtqanda qarjylyq saýattylyqty arttyrý, ózin ózi jumyspen qamtyǵandar men jeke kásipkerler úshin tıimdi sheshimder ázirleý, sondaı-aq kómirtegi izin baqylaý, qaǵazsyz bankıng, klıentterdiń ekologııalyq jaýapkershiligin arttyrýdy kózdeıtin «jasyl» bankıng pen ishki úrdisterdi avtomattandyrý men kıberqaýipsizdikti kúsheıtýdi qarastyratyn ishki turaqty damý salasy jatady.
«Qarjy tehnologııalary daǵdarystan keıingi kezeńde turaqty jáne ınklıýzıvti ortany qalpyna keltirýge kómektesetinine senimdimiz. Ornyqty damýdyń qazirgi jáne uzaq merzimdi mindetterin iske asyrýda qarjy salasynyń mańyzy zor. Muny retteýshi organdar, tutynýshylar, ınvestorlar jáne tutastaı qoǵam jaqsy túsinip otyr. Bul ásirese ekologııa, klımattyń ózgerýi, korporatıvtik basqarý jáne áleýmettik jaýapkershilik, ashyqtyq jáne eseptilik, qarjylyq qyzmetterdi usynýdaǵy tepe-teńdikke qatysty. Sondyqtan bıyl osy baǵyttardy qoldaımyz dep sheshim qabyldadyq. Baıqaýda qyzyqty usynystar bolatynyna úmit artamyz», dedi Mastercard halyqaralyq tólem júıesiniń Ortalyq Azııadaǵy bas dırektory Rafal Trepka.
Otandyq bank sektoryndaǵy ınnovasııalardy damytý – AHQO-nyń Tech Hub qyzmetine kiretin basym baǵyttardyń biri. Bul rette atalǵan ortalyq Mastercard-pen birlesip baıqaý ótkizýge qýana kelisti.
«Atalǵan baıqaý turaqty bankıng jáne ESG-bastamalar salasyndaǵy sheshimderge arnalǵan. Osy sala bizdiń naryqta qarqyndy damyp keledi. Sózsiz, bul elimizdiń ornyqty damýyna oń yqpal etedi. Osyndaı mańyzdy salany belsendi qoldaǵany úshin Mastercard pen baıqaýdyń seriktes bankterine rızashylyǵymyzdy bildiremiz», dedi AHQO Tech Hub tóraǵasynyń orynbasary Bekjan Mutanov.
AHQO-ǵa qarasty Tech Hub seriktes bankter tańdaǵan baǵyttarǵa sáıkes sheshimderdiń tehnologııalyq skaýtıngin (Ashyq ınnovasııalyq strategııanyń bir bóligi retinde úlken paıda ákeletin, tehnologııalyq máselelerdi sheship ónimdi ázirleýge, óz resýrstaryn ońtaılandyrýǵa, jańa seriktester taýyp, revolıýsııalyq tehnologııalarǵa jol ashýǵa kómektesetin element) júrgizip, bank ókilderi jáne Mastercard sarapshylarymen birge úzdik startaptardy irikteıdi. Onyń nátıjesinde úzdikter Qazaqstan naryǵynda jańa klıentterdi tabýǵa múmkindik alyp, óz ónimderin erkin saýdalaıtyn bolady.
Baıqaýǵa qatysýshylar Mastercard-tyń qoldaýymen jarystyń bir nemese birneshe seriktes bankimen (10 myń dollar somasyna deıin) qanatqaqty jobany iske qosý múmkindigine ıe bolady.
