Budan keıin Shý temir jol bólimshesinde poıyz dıspetcheri, Shý stansasy bastyǵynyń birinshi orynbasary, Saryshaǵan stansasynyń bastyǵy bolyp jemisti eńbek etti. Odan ári qyzmetin Selınnyı temir jol basqarmasynda jalǵastyrdy. Sózine berik, isine adal azamat qozǵalys qyzmetin jedel basqarý bóliminiń aǵa kezekshisi, júk jáne kommersııalyq qyzmettiń júk jáne kommersııalyq tasymaldaý sharttaryn uıymdastyrý bóliminiń bastyǵy boldy.
Eki birdeı dıplomy bola tura, Bektas Ahmetov Máskeý memlekettik ýnıversıtetiniń zań fakýltetinde «Azamattyq quqyq» mamandyǵy boıynsha da bilim aldy. Osydan soń onyń memlekettik qyzmet salasyndaǵy eńbek joly bastaldy. 1994 jyly Kólik jáne kommýnıkasııa mınıstrligine qyzmetke qabyldanyp, elimizdiń kólik ınfraqurylymyn damytýǵa ólsheýsiz úles qosty. Keıin soltústik aımaqtar boıynsha geodezııa jáne kartografııa komıtetiniń ókili retinde qyzmetin jalǵastyrdy. Úkimet janyndaǵy Jer resýrstaryn basqarý agenttigi geodezııa jáne kartografııa komıtetiniń «Aqmolatopogeodezııa» memlekettik kásipornyn, odan keıin «Astanatopografııa» memlekettik kásipornyn bas dırektor laýazymynda basqardy.
Toǵyzynshy terrıtorııaǵa ıelik etip otyrǵan Qazaq eliniń ulan-baıtaq jeriniń ár súıemin búginde álem moıyndaıdy. Bul asa mańyzdy iske Bektas Ahmetovtiń de qosqan úlesi bar. Ol memlekettik shekarany delımıtasııalaý jáne demarkasııalaý, jergilikti jerlerde shekarany belgileý jumystaryn uıymdastyrýǵa tikeleı atsalysty. Qazaqstandaǵy kartografııalyq-geodezııalyq salanyń damýyna baǵa jetpes úles qosty.
Keıin Qazaqstan Prezıdentiniń Is basqarmasynda qyzmetin jalǵastyryp, Memleket basshysynyń, sondaı-aq ózge de joǵary laýazymdy tulǵalardyń qatysýymen ótetin is-sharalardy uıymdastyrýǵa tikeleı qatysty. Prezıdent Is basqarmasynyń vedomstvolyq baǵynysty uıymdaryn kadrlarmen qamtamasyz etý jaýapkershiligin arqalady. 2010 jyly «Qazaqstan temir joly» kompanııasyna aýysyp, sol jerden qurmetti demalysqa shyqty. Zeınet demalysyna shyqsa da, qoǵamdyq ómirden qol úzgen joq. Izin basqan, isin jalǵastyrǵan kóp shákirt daıarlady. Eńbek sińirgen zeınetker, «Qurmetti temirjolshy» atandy. «Eren eńbegi úshin» medalimen, Ata Zańnyń 10 jyldyǵyna, Táýelsizdiktiń 20 jyldyǵyna jáne astananyń 20 jyldyǵyna arnalǵan mereıtoılyq medaldarmen, Ata Zańnyń 20 jyldyǵyna arnalǵan tósbelgimen marapattaldy.
Otbasy qurý – er azamattyń asyl paryzy. Ákemiz bul boryshyn da buljytpaı oryndady. Aıaýly anamyz Aıtkúl Rústembekovamen kóńil jarastyryp, shańyraq kóterdi. 43 jyl tatý-tátti ǵumyr keshken erli-zaıyptylar Gúlnaz, Aınur esimdi qyzdaryn tárbıelep, olardan taraǵan Tomırıs, Ámına, Ál-Mansur esimdi nemereleriniń qyzyǵyna bólendi. Únemi ómirlik tájirıbesine súıenip, aqyl-keńesin aıtyp, biz úshin shynaıy súıinetin de súısinetin jer betindegi eń jaqsy jar jáne áke boldy. Janyńyz jánnatta bolsyn, jarqyn adam!
Aıaýly jary, balalary, nemereleri
