Bul kúnderi volonterlardyń barlyǵy derlik kez kelgen aýa raıynda kıip júrýge yńǵaıly kıimder men kerek-jaraqtarǵa ıe boldy. Qazirdiń ózinde uıymdastyrý sharalaryna qatysa bastaǵan eriktiler bir-birimen tanysyp, bir maqsat jolyna jumyla kirisýge daıyn.
Volonterlarǵa ǵana emes, Ýnıversıada-2017 uıymdastyrýshylaryna, tehnıkalyq mamandar men tóreshilerine arnaıy kıim-keshek tigýge «Altyn Juldyz Textile» fabrıkasy tańdalynyp alynǵan.
«Altyn Juldyz Textile» fabrıkasynyń dızaınerleri men tehnologtary qysqy Ýnıversıadanyń uıymdastyrý komıtetimen birlese otyryp, bul kıimderdi ashyq ári yńǵaıly etip tigýge baryn salǵan.
– Máselen, volonterler kúrteshesi Ýnıversıada qonaqtary men qatysýshylarynyń kózine birden shalynatyndaı etip ashyq jasyl tústi bolyp tigildi. Ashyq túster qysqy Ýnıversıadany ótkizip otyrǵan el – Qazaqstannyń jaıdarlylyq sııaqty qasıetterin aıshyqtaıdy. Oǵan qosa, bul kıim jastarǵa da jaqsy jarasady, – deıdi dızaıner Zarına Ilııasova.
Arnaýly kıim tehnologi Lýıza Nurǵalıeva jarystar men uıymdastyrý jumystary kóbinese dalada ótetindikten, Almatynyń klımattyq ereksheligi eskerilgenin aıtady.
Osyǵan qosa, eriktiniń ýnıformasy qajetti barlyq kıimmen qamtamasyz etilgen, onyń ishinde kúrte, kombınezon, keńjeıde, qolǵap, bókebaı jáne tymaq bar. Sondaı-aq, eriktige rıýkzak da berildi. Kıim jıyntyǵynyń barlyǵynda Ýnıversıada-2017 jáne FISÝ logotıpteri, Almaty qalasynyń brendi, EKSPO logotıpteri jáne Ýnıversıada seriktesi – «Samuryq-Qazyna» AQ logotıpi beınelengen.
