Is-shara QR Premer – Mınıstriniń orynbasary-Saýda jáne ıntegrasııa mınıstri Baqyt Sultanovtyń, Úndistannyń Syrtqy ister jáne mádenıet memlekettik mınıstri Mınakshı Lekhıdiń, sondaı-aq dıplomatııalyq korpýs ókilderiniń qatysýymen ótti.
«Abaı – uly aqyn ǵana emes, kemeńger oıshyl, áıgili aǵartýshy. Ol jurtty ǵylym ıgerýge, bilimdar bolýǵa úndedi. Jańashyldyq pen jasampazdyqty dáriptedi. Abaı murasy – bizdiń elimizge ǵana emes, barsha adamzatqa ortaq qundylyq», dedi B. Sultanov.
Ol Mahatma Gandıdiń týǵan jerine qazaq aǵartýshysynyń bıýstin ornatý tereń sımvoldyq mánge ıe ekenin atap ótti. Abaı men Gandı ıdeıalary bir-birimen tyǵyz baılanysty.
Máselen Abaı: «teginde, adam balasy adam balasynan aqyl, ǵylym, ar, minez degen nárselermen ozbaq. Onan basqa nársemenen ozdym ǵoı demektiń bári de – aqymaqtyq», degen sózi bar. Bul qasıetterdi Mahatma Gandı de baǵalaǵan. Ol «sizdiń senimińiz sizdiń oıyńyzǵa aınalady, oıyńyz sózińizge aınalady, sózińiz árekińizge, al áreketińiz ádetke, ádet sizdiń qundylyǵyńyzǵa, qundylyqtaryńyz sizdiń taǵdyryńyzǵa aınalady», degen.
Baqyt Sultanov Abaı bıýstiniń ornatylýy eki el arasyndaǵy rýhanı yntymaqtastyqty odan ári nyǵaıta túsetinin atap ótti. Sondaı-aq taraptar bilim, ǵylym jáne mádenıet salasyndaǵy yntymaqtastyqty damytýdy jalǵastyrady.
Nıý-Delı qalasynda Abaı bıýstiniń ashylýyna arnalǵan saltanatty is-shara Qazaqstan Respýblıkasy men Úndistan Respýblıkasy arasyndaǵy saýda-ekonomıkalyq, ǵylymı-tehnıkalyq, ónerkásiptik jáne mádenı yntymaqtastyq jónindegi Úkimetaralyq komıssııanyń 14-otyrysyna qatysý úshin Qazaqstan Respýblıkasy delegasııasynyń Úndistanǵa sapary sheńberinde ótti.
Aıana Toǵanbek
