Kezdesý barysynda Qazaqstannyń BUU-áıelder qurylymymen yntymaqtastyǵynyń birqatar ózekti máseleleri talqylandy. Ulttyq komıssııa tóraǵasy Qazaqstan Respýblıkasy men BUU-áıelder qurylymy yntymaqtastyǵynyń joǵary deńgeıin atap ótti. Genderlik teńdikke qol jetkizý, áıelderdiń quqyqtary men múmkindikterin keńeıtý, turmystyq zorlyq-zombylyqtyń aldyn alý máseleleri boıynsha jobalardy iske asyrýǵa BUU-áıelder eldik keńsesiniń belsendi qatysýy osy salalarda aıtarlyqtaı tabystarǵa qol jetkizýge múmkindik berdi.
Aıda Balaeva BUU-áıelder qurylymy QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń negizgi strategııalyq áriptesi ekenin, onymen birlesip birqatar jobalar men zertteýler tabysty iske asqanyn atap ótti.
QR Prezıdenti Ákimshiligi Basshysynyń orynbasary «Otbasyndaǵy zorlyq-zombylyqsyz Qazaqstan» kópsalaly pılottyq jobasyn iske asyrýǵa, barlyq óńirlerde áıelder kásipkerligin qoldaý ortalyqtaryn ashýǵa, bıýdjetti genderlik-baǵdarlanǵan qalyptastyrýdy engizý jónindegi jobalarǵa qoldaý kórsetkeni úshin rızashylyǵyn bildirdi.
Sondaı-aq BUU Qaýipsizdik Keńesiniń beıbitshilik pen qaýipsizdikti qamtamasyz etýge áıelderdiń teń quqyly qatysýy jónindegi qararlaryn iske asyrý, áıelderdiń múmkindikterin keńeıtý salasynda tájirıbe almasý úshin bilim platformasyn qurý, is-qımyl Koalısııalary jónindegi jahandyq bastama jáne Ortalyq Azııa men Aýǵanstanǵa arnalǵan Spotlight Initiative óńirlik baǵdarlamasy sheńberinde Qazaqstannyń mindettemelerin iske asyrýǵa járdemdesý máselelerinde áıelderdiń joǵary úlesi men kúsh-jigeri atap ótildi.
Taraptar yntymaqtastyqtyń qazirgi damý qarqynyna qanaǵattanatyndyqtaryn bildirip, birlesken jobalardy júzege asyrý máselelerin talqylady. Qazaqstanda aımaqtyq Genderlik bilim ortalyǵyn qurý múmkindigine erekshe nazar aýdaryldy. Ortalyqtyń ashylýy genderlik teńdikti qamtamasyz etý, Ortalyq Azııadaǵy áıelderdiń bolashaǵyn, jaǵdaıyn jáne qajettilikterin taldaý úshin qajetti tájirıbeni men resýrstardy aımaqta taratýǵa yqpal etedi.
Otyrys sońynda Ulttyq komıssııa tóraǵasy A.G.Balaeva Bhatııa hanymǵa jáne Qazaqstandaǵy ókildiginiń basshysy Marııa Dosenko hanymǵa jemisti jumysy úshin alǵys aıtyp, Qazaqstan áıelderdiń quqyqtaryn keńeıtý boıynsha alǵa qoıylǵan maqsattardy ári qaraı da ustanatyny jáne birlesken jobalar men bastamalardy qoldaıtyny týraly sendirdi.
