Sport bilim alýǵa kedergi keltirmeıdi

Osy oıynnyń nátıjesi qaı komandanyń jeńimpaz atanatynyn aıqyndady. Sóıtip, asa tar­tysty kezdesý barysynda Y.Altyn­sarın atyndaǵy №65 mektep-gım­nazııasynyń komandasy №90 jalpy bilim beretin orta mekteptiń ko­mandasynan basym tústi. Qory­tyndy esep – 3:1.

Y.Altynsarın atyndaǵy №65 mektep-gımnazııasynyń komandasyna 20 mln teńge kólemindegi bas júlde buıyrdy. Tıisinshe, ekin­shi oryndy №90 jalpy bilim beretin orta mekteptiń quramasy enshilese, júldeli úshinshi oryndy T.Tájibaev atyndaǵy №47 mektep-gımnazııasynyń jas fýtbolshylary jeńip aldy.

Fýtbol – jasóspirimder arasynda eń tanymal sport túrleriniń biri. Alaıda qala mektepteriniń Shymkent Jastar lıgasynda óner kórsetýi óskeleń urpaqtyń voleıbol, basketbol jáne shahmat syndy ózge de sport túrlerine degen qyzyǵýshylyǵyn oıatty. Bul úsh sport túri de jobaǵa engizilgen. Sondyqtan atalǵan sport túrleri boıynsha uıymdastyrylǵan jarys jeńimpazyna basty marapat retinde 20 mln teńge kóleminde qarjylaı júlde qarastyrylyp otyr. Jal­py, júlde qory 80 mln teńgeni qu­raıdy. Bul qarajat demeýshiler  esebinen qarastyrylǵan bolatyn.

Tanymal qazaqstandyq sport­shylardyń basym kópshili­giniń jeńis joly mektep qabyrǵasyn­daǵy spartakıadalarda baǵyn­dyrǵan belesterden bastaý alǵany anyq. Osy qaǵıdany qaperge alǵan jergilikti bılik búginde mektep oqýshylarynyń neǵurlym kóp bóligine úlken sportqa jol ashý, olardy deneshynyqtyrýmen aı­nalysýǵa jáne salamatty ómir saltyn ustanýǵa baýlý maq­sa­tynda jú­ıe­li jumys istep jatqan jaıy bar.

Qalada Jastar lıgasyna degen qyzyǵýshylyq artyp keledi. Byltyr jobaǵa 140 mek­tep qa­tysqan bolsa, bıyl bul kór­setkish 151-ge jetti. Sporttyń tórt túri boıynsha uıymdastyrylǵan ja­rys­qa jalpy alǵanda 6 myńǵa jýyq oqýshy qatysty. Olar fýtbol, voleıbol, basketbol jáne shahmat oınap, kil myqtyda kim myqtyny anyqtady.

– Men 7-synypqa deıin fýtbolmen aınalystym. Al keıingi úsh jylda basketbolǵa degen ańsarym aýyp, sporttyń osy túrine den qoıyp kettim. О́z basym osy oıyn túrin orkestrge uqsatamyn. Sebebi ár detal mańyzdy. Árbir usaq-túıek dúnıe ózara túsinistikke áser etedi. Sonyń barlyǵy túpki nátıjede kórinis tabady. Bul tek alańda ǵana emes, oıynnan tys ýaqytta da baǵaly dúnıe, – dedi M.H.Dýlatı atyndaǵy №8 mektep-gımnazııasynyń 11-synyp oqýshysy ári basketboldan mektep komandasynyń kapıtany Ersultan Ahmetbek.

Ersultan kún saıyn kem degende eki saǵat ýaqytyn sport alańynda ótkizetinin jasyrmady. Alaıda bul áreket sabaqty jaqsy oqýǵa kedergi keltirmeıdi. Kerisinshe, temirdeı tártipke tár­bıelep, ýaqytty durys jospar­laýǵa, bárine úlgerý úshin kún tártibin qatań saqtaýǵa úıretedi. Mektep túlegi úshin jattyǵý – ómirlik qajettilikke aınaldy. Tipti, basketbolǵa áýestengeni sonsha, aldaǵy ómirin sportpen ushtastyrýǵa bel baılady.

Árıne, M.H.Dýlatı atyndaǵy №8 mektep-gımnazııasy oqýshy­larynyń byltyr Shymkent Jas­tar lıgasynyń jeńimpazy atan­ǵany jaqsy motıvasııa bolǵany anyq. Sol alǵashqy jarystarda komanda túgelge jýyq osy quramda oınady.

Bir jyldyq jattyǵý oıyn sapasyn budan da bıik degeıge kóterýge múmkindik berdi. Koman­da kezekti orasan zor jeńiske jeterine kúmán keltirgen joq. Ba­lalardyń óz ózine degen dál mundaı seniminiń artynda qajyr­ly eńbek, oıyn tehnıkasyn je­tildirý men udaıy daıyndyq tur­ǵany belgili.

– Biz qorjynǵa salǵan kezekti 20 mıllıon teńgeni mektep qandaı maqsatta jumsaıtynyn bilmeımiz. Byltyr júlde qarajatyna mektepke arnap ınteraktıvti taqtalar satyp alyndy. Bul taqtalar oqý­shylardyń bilim alýyna kóp kó­mektesedi. Máselen, ınternet bar, sýret salýǵa qajetti dú­nıeni júktep alýǵa, ártúrli dúnıe­ni quras­tyrýǵa bolady. Bul múldem basqa deńgeı. Qarajat mekteptegi barlyq kabınetti osyndaı taq­talarmen jabdyqtaýǵa jetti, – dedi Ersultan Ahmetbek.

J.Aımaýytov atyndaǵy №64 mektep-gımnazııasynyń quramasy lıga jarystaryna alǵashqy ret qatysyp otyr. Soǵan qaramastan voleıbolshylar komandasy júl­deli úshinshi oryn ıelenip, tamasha nátıje kórsetti.

– Biz óz nátıjemizge rızamyz. Eń aldymen, bizdi jattyqtyrǵan mu­ǵalimge alǵys aıtamyz. Mekte­bimizdi jerge qaratqan joqpyz. Kele­si jyly nátıjemizdi budan da jaq­sarta túsemiz dep oılaımyn, – dedi 9-synyp oqýshysy Aqnıet Hasanova.

Voleıboldan bas júlde Ál-Farabı atyndaǵy №113 jalpy bilim beretin orta mekteptiń komandasyna buıyrdy. Al ekinshi oryndy A.Baıtursynov atyndaǵy №50 mektep-gımnazııasynyń oqýshylary ıelendi.

Shahmat taqtasyndaǵy shaıqas­tarda O.Joldasbekov atyn­daǵy №9 IT mektep-lıseıiniń oqý­shylaryna teń keler eshkim bolǵan joq. Ekinshi oryndy Y.Al­tynsarın atyndaǵy №65 mektep-gımnazııasynyń zııatkerleri ıe­len­di. Úshinshi oryndy T.Táji­baev atyndaǵy №47 mektep-gımna­zııasynyń shahmatshylar komandasy jeńip aldy.

Tórt sport túriniń árqaısysyn­da top jarǵan birinshi oryn ıeger­lerine aqshalaı júldelerdi Shym­kent qalasynyń ákimi Marat Áıte­nov tabystady. Onyń bastamasy­men byltyr dál osy aýqymdy sport­­tyq joba bastaý alǵan bolatyn.

– Shymkent Jastar lıgasy qalamyzda ekinshi ret ótkizilip otyr. Joba el Prezıdentiniń tapsyrmasy boıynsha iske asyrylyp, buqaralyq sportty damytýǵa jáne jastardy patrıottyq rýhta tárbıeleýge baǵyttaldy. Sebebi sport tek densaýlyqtyń kepili ǵana emes, sonymen qatar erik-jigerdi janyp, tabandy bolýǵa talpyndyrady. Búgingi týrnırdiń jeńimpazdary óz mektebiniń abyroıy men bedeli úshin kúresti. Bul balalar erteń naǵyz azamat bolyp, el namysyn qorǵap, Otanǵa qyzmet etedi dep senemin. Búgingi jeńis sizderdiń aldaǵy ómirlerińizdiń tamasha bastamasy bolsyn, – dep Murat Áıtenov jas sportshylardy jeńisimen quttyqtady.

Irikteý kezeńderi men jarystar azdy-kópti úsh aıǵa sozyldy. Ony uıymdastyrýmen ári tóreshilik etýmen deneshynyqtyrý jáne sport salasyndaǵy 400-ge jýyq maman aınalysty. Jat­tyq­tyrýshylar tek oıyndy baǵalap qana qoımaı, respýblıka chem­pıo­nattarynda óner kórse­tetin qurama komandalarǵa eń myq­ty oıynshylardy tańdap alý maqsatynda jas sportshylarǵa muqııat zer saldy. Bul da Shymkent Jastar lıgasyndaǵy mańyzdy erekshelikterdiń biri sanalady.

ShYMKENT