Táýelsiz Qazaqstannyń Memlekettik týy resmı túrde 1992 jyly 4 maýsymda qabyldandy. Dál osy kúni Joǵarǵy Keńes depýtattary 6 saǵatqa sozylǵan otyrys barysynda egemen elimizdiń Memlekettik rámizderin qabyldady. Belgili sýretshi Sháken Nııazbekovtiń jasap shyqqan Týy bekitildi. Eki kúnnen keıin Abaı atyndaǵy opera jáne balet teatrynda Memlekettik rámizder jurtshylyqqa tanystyryldy. Eń alǵash kók baıraq Prezıdent rezıdensııasy men Joǵarǵy Keńes ǵımaratynyń tóbesinde kóterildi.
Osy tusta sál sheginis jasap, taǵy bir oqıǵaǵa toqtalǵymyz kelip otyr. Memlekettik tý resmı túrde 1992 jylǵy 4 maýsymda bekitilgenimen, Táýelsiz Qazaqstannyń jalaýy tuńǵysh ret shetelde 1992 jylǵy 2 naýryzda kóterildi.
1992 jyldyń 2 naýryzynda BUU Bas Assambleıasynyń plenarlyq májilisinde Qazaqstan Birikken Ulttar Uıymyna qabyldanyp, álemdik qoǵamdastyqtyń tolyqqandy múshesine aınaldy. Sodan keıin BUU shtab-páterinde ótken saltanatty rásimde BUU Bas hatshysynyń «Qazaqstan Respýblıkasynyń Memlekettik týy kóterilsin», degen sózinen keıin baıraǵymyz kókte jelbiredi.
«Táýelsizdigimizdi jarııalaǵannan keıin eki kún ótken soń, 1991 jylǵy 18 jeltoqsanda Prezıdent Nursultan Nazarbaevtyń tapsyrmasymen Nıý-Iorkke ushyp kettim. Maqsat – Qazaqstan Respýblıkasynyń ókili retinde elimiz ben BUU arasynda baılanys ornatý bolatyn.
1992 jylǵy 2 naýryzda BUU Bas Assambleıasynyń 46-sessııasynan keıin Qazaqstan biraýyzdan BUU quramyna qabyldandy. Qazaqstan halqy atynan otyrysta sóz sóıleý baqyty buıyrdy. Osy oqıǵadan keıin Prezıdent Jarlyǵymen Qazaqstannyń BUU-daǵy turaqty ókili qyzmetine kiristim», dep eske alady osy sátti Qazaqstannyń BUU-daǵy tuńǵysh turaqty ókili Aqmaral Arystanbekova.
Elimiz jahandyq uıymǵa qabyldanǵannan beri kók Týymyz áli kúnge deıin Nıý-Iorkte jelbirep tur. Kóp uzamaı-aq aldymen Amerıka Qurama Shtattarynda, sodan keıin Túrkııada, Majarstanda elshilikter ashyldy. Reseıdegi ókildik elshilikke aınaldyryldy. Jalpy, 1992-1993 jyldary elimizdiń BUU, Reseı, Qytaı, AQSh, Túrkııa, Fransııa, Belgııa, Vengrııa, Iran, Úndistan, Mysyr, О́zbekstan, Qyrǵyzstan, Ázerbaıjan men Ýkraınadaǵy elshilikteri men ókildikteri jumysqa kiristi.
Bıyl Qazaqstan Respýblıkasy dıplomatııalyq qyzmetiniń 30 jyldyǵy. Osy ýaqyt aralyǵynda 180-nen asa memleketpen dıplomatııalyq qatynas ornatylǵan, shetelderde kóptegen elshilik ashyldy. Qazaqstanda 95 sheteldik ókildik jumysqa kiristi. Dıplomatııanyń geografııasy ulǵaıdy. Buryn Qazaqstannyń qatynastary, negizinen Eýropaǵa, Azııaǵa jáne Soltústik Amerıkaǵa baǵyttalǵan edi. Keıingi kezde Latyn Amerıkasy men Afrıkaǵa basymdyq berile bastady. Orta jáne Taıaý Shyǵyspen baılanys tereńdep keledi. Búginde elimizdiń shartaraptyń túkpir-túkpirindegi elshilikteri men ókildikteri sany 93-ke jetti.
«Toǵyzynshy terrıtorııanyń» Memlekettik týy tuńǵysh ret halyqaralyq qoǵamdastyq nazaryna usynylǵan sáti – 1992 jylǵy Barselonada ótken Olımpııa oıyndary desek qatelespeımiz. Oǵan Qazaqstan TMD Olımpıada quramynyń atynan qatysqanymen, dúbirli dodanyń ashylý saltanatynda balýan Dáýlet Turlyhanov Kók Týymyzdy kóterip shyqty. Osy baıraqty básekede qazaqtyń abyroıyn asqaqtatqan Dáýlet balýannyń qola medal ıelengenin de aıta ketken jón bolar.
Eki jyldan keıin Lıllehammerde ótken qysqy Olımpıadaǵa Qazaqstan derbes memleket retinde qatysyp, sportshylarymyz kók baıraqtyń astynda óner kórsetti. Shańǵyshy Vladımır Smırnov Olımpııa oıyndarynda úsh júlde jeńip aldy. Sonyń biri – altyn medal. Osylaısha, Ánuranymyz tuńǵysh ret shyrqalyp, Memlekettik týymyz kókke kóterildi. Lıllehammerdegi Olımpıada qazaq sportshylarynyń jeńisti jylnamasynyń irgetasyn qalap berdi. Sodan beri sańlaqtarymyz 15 márte Ánuranymyzdy shyrqatty. 25 kúmis, 39 qola júlde jeńip alyp, osynshama márte kók Týymyz kókte jelbiredi.
