Rámiz daıyndaý – jan rahaty

Mańyzdy sharýany qolǵa alyp, sapaly ónimdermen tapsyrys berýshilerdiń kóńilinen shyǵa bilgen pavlodarlyq Rainbow kompanııasynyń basshysy Bekbolat Ybyraevpen áńgimelesken edik. Atalǵan seriktestiktiń ónimderi respýblıkanyń túkpir-túkpirin kezip júr.

– Memlekettik rámizderdi shyǵarýdy 2010 jyldan bastadyq. Oǵan deıin bul sharýany jiti zerttedim. Sapaly ónim shyǵarý úshin sapaly shıkizat qajet. Aqyry Qytaıǵa baryp, ondaǵy bir kompanııamen 5 jyldyq kelisimshartqa otyrdyq. Sodan beri shıkizat problemasy týyndaǵan emes. Pandemııa kezinde de túsinbeýshilikter oryn alǵan joq. Kelisimsharttyń aıaqtalýyna bir jyl qaldy. Jasyratyny joq, «Qytaıdyń taýary» dese kópshiligi sapasyz ónimdi oıǵa alady. Qytaıda sapaly taýar, sapaly shıkizat jetkilikti. Sapasy jaqsy bolsa, baǵasy da qymbat degen sóz. Dese de bizdiń ónimder qoljetimdi baǵamen bosatylady. Sebebi deldalsyz jumys isteımiz, – deıdi B.Ybyraev.

Lısenzııa alýdyń ońaı sharýa emes ekenin aıttyq ǵoı. Atalǵan kompanııa 2017 jyly lısenzııasyn jańartqan. Ol ýaqytta talaptarǵa ózgerister engizilip, sıfrly turǵyda tústerdi anyqtaıtyn qondyrǵynyń bolýy mindettelgen. Sóıtip, Japonııadan qymbat qondyrǵy satyp alynypty. Qondyrǵy demekshi, óndiristegi barlyq qurylǵy shetelden ákelingen qymbat dúnıeler. Ony beker aıtyp otyrǵanymyz joq. Keıbireýi bul sharýany ońaı kórýi múmkin. Memle­kettik mekeme ǵımarattarynyń tóbe­sin­de jelbirep turǵan Kók Tý men ishinde jarqyrap turǵan Eltańbany jasaý – arzan eńbek emes.

Munda aıyna 400 tý (ǵımarattyń syrtyna arnalǵan), kabınetterdiń ishinde turatyn 20-30 tý, 200-300 eltańba shyǵarylady eken. Memlekettik rámizder ereje boıynsha birneshe jyl ishinde jańartylyp turýǵa tıis. Son­dyq­tan da kompanııa suranysqa bas qatyryp kórgen emes.

 – О́nimge aldyn ala tapsyrys be­ri­ledi. Keıde tapsyrys berýshiler de­ma­lys kúni «jedel túrde bir táýliktiń ishinde daıyndap berseńizder» dep qolqa salady. Mundaıda keıbireýler baǵany sharyqtatyp jiberetini bel­gi­li. Tyǵyryqqa tirelgen adam kez kel­gen baǵaǵa kónedi. Biz bolsaq baǵany qym­bat­tatpaı, tipti 10 paıyz jeńil­dik­pen daıyndap beremiz. Árıne rıza bolǵan tapsyrys berýshiler bizdiń kompanııany ózgelerge usynyp, maqtap júretini sózsiz. Osylaısha, menedjment baǵytyn damytýdy da esten shyǵarǵan emespiz, – deıdi Bekbolat Quntaıuly.

Atalǵan kompanııa memlekettik rámizderdi daıyndaýmen qatar, banner jasaý, mektepterdiń bezendirilýi sııaqty ózge de baǵytta eńbek etýde. Maqala mem­le­kettik rámizder kúnine oraı ja­zyl­­ǵandyqtan ol jaıly asa suraı qoı­ǵan joqpyz. Munda shamamen 10 adam nápaqa aıyryp júr eken. Árqaısysy – óz isiniń mamany. «Memlekettik rámizderdi da­ıyndaý – óte jaýapty mindet. Eldiń bas­ty nyshanyn shyǵarǵandyqtan, ar­tyl­ǵan jaýapkershilik te aýyr. Muny qol astymdaǵy qyzmetkerler de jaqsy biledi. Sondyqtan olar ár iske yj­da­ǵat­ty­lyqpen qaraıdy», deıdi áńgime­mizdiń keıipkeri.

Búginde uly Mádı de mańyzdy sha­r­ýany jandandyrýǵa atsalysyp júr. Bekbolat aǵa basshy bolǵanymen, ja­ýap­­kershiligi mol istiń basy-qasynan árdaıym ózi tabylady. Jalpy, bul áýletke qolóner daryǵan desek, artyq aıtqanymyz emes. Ákesi Quntaı da elge tanymal etikshi bolypty. Urpaqtar sa­baq­tastyǵy degen osy emes pe?!

Bekbolat Ybyraev – Baıanaýyldyń týmasy. Mamandyǵy – muǵalim. Kezinde Egindibulaq aýylynyń mektebinde eńbek, syzý, sýret, mýzyka pánderinen sabaq bergen. Sol ýaqytta onyń kabıneti be­zendirilýi jaǵynan aýdanda eń úzdik sanalypty. Segiz qyrly, bir syrly azamatqa ómirin mándi etý úshin tańdaý kóp edi. Aqyry, zamannyń aǵ­y­my­nan qalmaı, qazirgi is qylyp otyrǵan sha­rýany jandandyrýǵa nıet etipti. Qosh­ta­sarda ustazy Zekebaı Sol­tan­baevtyń myna sózin eske aldy: «Adam jumysyna qýana baryp, qýanyp qaıtý kerek». Bekbolat aǵamyz da taǵdyr tań­daýyna esh ókinbeıdi, jastardy memle­kettik rámizderdi qurmetteýge shaqy­ra­dy.

Pavlodar oblysy