«Barshańyzdy Qazaqstanda bolyp jatqan tarıhı máni bar saıası oqıǵanyń ótip jatqanymen quttyqtaımyn. Referendýmnyń negizgi maqsaty – eldiń basty zańy Konstıtýsııaǵa ózgerister engizý. Bul qazaq eli úshin, qazaqstandyqtar úshin erekshe mańyzy bar is-shara. Halyqty aqparattandyrý óte jaqsy deńgeıde júrgizilgen. Referendým ýchaskeleriniń daıyndyǵy kóńilden shyqty. Barlyǵy da joǵary deńgeıde. Saıası sharaǵa qazaqstandyqtardyń beı-jaı qarap jatpaǵanyn baıqaımyz. Bári de el erteńi jarqyn bolýy úshin úlken belsendilikpen daýys berýge kelip jatyr», dedi Á.Bekmatov.
Spıker saılaýshylar úshin de, baqylaýshylar úshin de jaqsy jaǵdaı jasalǵanyn atap ótti.
Ol Qyrǵyzstannan barlyǵy 15 ókildiń kelgenin, olardyń qazir Nur-Sultan, Almaty qalalarynda jáne Jambyl oblystarynda jumys istep jatqanyn jetkizdi.
Jalpy el boıynsha 10 013 referendým ýchaskesi jumys istep tur. Al qatysý quqyǵy bar azamattar tizimi – 11 mln 722 myń 536 adam. Sondaı-aq 52 elde 65 ýchaskelik referendým komıssııasy jumys istep jatyr.
