Jalpy, munda 2161 adam daýys berýshi retinde tirkelgen. Al 9 adam múmkindigine qaraı úıinen daýys beredi dep josparlanǵan. Búgin tańǵy saǵat 07:00-de №72 saılaý ýchaskesine kelip alǵash daýys bergen azamat Sháripbaı Ábilqasymov. Jetpis bes jastaǵy qarııa elimizdegi oń ózgeristerge senetinin jetkizdi. Sondaı-aq, atalǵan bilim oshaǵynda uzaq jyldar boıy ustazdyq qyzmet atqarǵan Jámılá Janqorazova da ózgeristi qalaıtynyn, qazaq eliniń bolashaǵy úshin daýys berýge kelgenin aıtty.
Sondaı-aq, Taraz qalasyndaǵy №493 saılaý ýchaskesinde 1998 saılaýshy tirkelgen. Referendým komıssııasynyń tóraǵasy Aıda Qasenova qazirgi ýaqytta tórt júzge tarta azamattyń daýys bergenin málimdedi. Al Taraz qalasyndaǵy №6 bóbekjaı balabaqshasy partııalyq emes baıqaý ortalyǵynyń ókili Dına Orazalıeva saılaýdyń óz deńgeıinde ótip jatqanyn aıtty. Baqylaýshy óz sózinde birinshi bolyp saılaý ýchaskesine kelgen azamattar men 18 jasqa tolyp, alǵash ret tańdaý jasap otyrǵan azamattarǵa da syılyq berilgenin atap ótti.
