Kórermen qaýymnyń zor yqylasyna bólengen «Rok mýzykasynyń altyn hıtteri» konserti «Astana keshteri» HI halyqaralyq festıvalin qorytyndylady.
Sımfonııalyq mýzykamen kómkerilgen rok ánderi zaldaǵy kórermenderdi birden baýrap, tamasha atmosfera syılady. Queen, Beatles, Kiss, Pink Floyd, Metallica, Scorpions, Led Zeppelin, Europe toptarynyń ataqty ánderin ıtalııalyq dırıjer Roberto Molınellıdiń jetekshiligimen «Astana balet» teatrynyń orkestri oryndady. Zamanaýı mýzykanyń ańyz tulǵalaryna arnalǵan úlken konserttik jobalardyń avtory, kompozıtor, dırıjer Roberto Molınellı «Astana keshteri» festıvaline budan buryn da birneshe ret qatysqan.
Joba aıasynda onyń «Queen» (2018 j.) jáne «AVVA» (2021 j.) toptaryna arnalǵan konsertteri joǵary deńgeıde ótti. Maestronyń aıtýynsha, «Astana keshteri» álemniń úzdik oryndaýshylaryn toǵystyrǵan erekshe festıvalge aınaldy. «Bıylǵy festıvaldiń men úshin basty ereksheligi – ár túrli mýzykalyq janrlardyń úılesim tabýy. Rok hıtteri, sımfonııalyq mýzyka men balet sahnasynyń qosyndysy jańa emosııa syılady. «Astana keshteri» festıvaline alǵysym zor», dep jetkizdi Roberto Molınellı.
Sahnada Iogan Bodıng (Shvesııa), Sımone Romanato (Italııa), gıtarıst Rıkkardo Bertossını (Italııa) syndy belgili eýropalyq ártister óner kórsetti. Álemdik óner juldyzdary naǵyz mýzykalyq shoý jasady. «Bul meniń Qazaqstan eline alǵash ret kelýim. Alǵan áserim tamasha. Eýrazııa tórinde ornalasqan memlekette mýzykanyń jańa formattaryn zor yqylaspen qabyldaıtyn tyńdarmandardyń kóp bolýy meni tańǵaldyrdy», dep bólisti konsertten keıin shvesııalyq ánshi Iogan Bodıng. Anshlagpen ótken konsert «The Show Must Go On» ánimen aıaqtaldy.
Eske salsaq, «Degdar» gýmanıtarlyq qory uıymdastyrǵan «Astana keshteri» festıvali bıyl óner súıer qaýymǵa 4 jańa konsert usyndy. Belgili kompozıtor Per Tıllýanyń shyǵarmashylyq keshi, Berlın konserttik orkestriniń súıemeldeýimen ótken ataqty vıolonchelıst Narek Ahnazarıan men tanymal pıanıst Vadım Holodenkonyń konsertteri elorda kórermenderin tamsandyrdy.
Jalpy, «Astana keshteri» mýzykalyq ónerdiń san túrli janrlaryn biriktiretin erekshe konsepsııanyń arqasynda elimizdiń mádenı ómirindegi ıgi dástúrge aınaldy. Joba aıasynda kórermender klassıka, halyq, estrada mýzykasyn Qazaqstanǵa jáne barsha álemge tanytyp júrgen úzdik oryndaýshylardyń ónerin tegin tamashalaı alady. Festıvaldiń qonaqtary álemdik sahnalardy baǵyndyrǵan óner juldyzdary bolǵanyna qaramastan, konsertterge barlyq bıletter tegin taratyldy. «Astana keshteri» - álemde teńdesi joq festıval, sebebi bul jobanyń arqasynda álemdik ónerdiń ozyq úlgileri keń aýqymdy aýdıtorııaǵa jaqyn bola túsedi.
