Osylaısha, Taldyqorǵandaǵy Oqýshylar saraıynda «Jas ushqysh» mektebi jumysyn bastady. Bul qýanyshty jańalyq Balalardy qorǵaý kúni merekesine oraılastyryldy. Endi bul qosymsha bilim berý uıymynda 160 bala avıasııa salasynyń alǵashqy álippesi týraly dáris alatyn bolady. Al mekteptiń ashylý rásimine oblys ákimi Qanat Bozymbaev qatysyp, oqýshylarymen kezdesti. Oqýshylar saraıyndaǵy arnaıy jasaqtalǵan kabınettiń materıaldyq bazasymen tanysqan Qanat Bozymbaev balalardy merekelerimen quttyqtap, tilegin jetkizdi.
– Kúni erteń bireýiń ushqysh, biriń stıýardessa, endi biriń bort mehanıgi bolyp, bolashaq ómirlerińdi avıasııamen baılanystyrýlaryń múmkin. Bul mektep sol arman-maqsattaryńa jol kórsetedi. Bolashaqta oblys aýmaǵynda avıasııalyq kolledj ashylady, elimizde azamattyq avıasııa akademııasy, áskerı ýchılısheler bar. Osy mektepten qanattanyp shyǵyp, bilimderińdi sol oqý oryndarynda jalǵastyrýlaryńa bolady. Osy mektepte jaqsy oqyp, durys bilim alyp, Taldyqorǵannyń atyn shyǵaryp, úlken dárejege jetesińder dep senemin, – dedi Q.Bozymbaev.
Aıtpaqshy, osy shaǵyn is-sharaǵa Azamattyq avıasııa akademııasynyń prorektory Aljapar Sáretbaev ta arnaıy kelgen eken. Ol kisi jetkinshekterge Aıdyn Aıymbetovteı azamat bolýlaryna tilektestik bildirdi. Jalpy, mundaı mektep buǵan deıin tek Aqtóbe klasynda ǵana jumys istep kelgen eken. Taldyqorǵandaǵy bul úıirme – elimizde ashylyp otyrǵan ekinshi mektep. Iаǵnı balalarǵa kásibı baǵyt-baǵdar berýde bul úıirmeniń bereri kóp bolmaq.
Qonaqtarmen áńgimelesý barysynda balalar armandaryn aıtyp, oı bólisti. Máselen, mektepke alǵashqylardyń biri bolyp jazylǵan Dınara Dıhanbekova «Men kishkentaı kezimnen stıýardessa bolǵym keletin. «Jas ushqysh» mektebi ashylǵanda qatty qýandym. Ushaqta adamdardy kúlip shyǵaryp salyp, kúlip qarsy alǵym keledi», – deıdi. Mundaǵy balalardyń taǵy biri ekologııaǵa zııansyz jańa ushaq qurastyrýdy armandasa, endi biri ushaqtyń árbir usaq tetikteriniń bárin meńgergisi keledi.
Al «Jas ushqysh» úıirmesiniń jetekshisi Sergeı Chernyshov qazirdiń ózinde mektepke 5-10 synyp oqýshylary arasynan 20 bala jazylyp, 8 top qurylǵanyn aıtady. Jalpy, 160 bala dáris almaqshy. Olarǵa sabaq-tapsyrmalar jas erekshelik deńgeıine qaraı beriledi eken.
Almaty oblysy
