Al endi, osy úıge qatysty tarıhtyń bir parasy Ult ustazy Ahmet Baıtursynuly esimimen tyǵyz baılanysty. Ataqty ǵalym Aqjan Mashanıdiń jazýy boıynsha, bul aıadaı ǵana ǵımaratta 1904-1909 jyldar aralyǵynda Ahań bala oqytqan eken.
Qarqaraly aýdandyq mádenıet jáne tilderdi damytý bóliminiń mamany Dana Álıeva bul úıdiń ábden eskirgenin aıtady.
– Bir kezderi bul úı mektep bolǵan, al ótken ǵasyrdyń 90-jyldary ǵımaratta baılanys bólimshesi men taý-ken baıytý kombınatynyń sharýashylyq keńsesi ornalasty. Sodan keıin biraz ýaqyt bos turdy, – deıdi ol.
Aǵash úıdi qıraýdan aman alyp qalǵan aýyl aqsaqaldary eken. Ǵımarat 2002 jyly «Jibek joly» baǵdarlamasynyń aıasynda qalpyna keltirilipti jáne onyń syrty sharbaqpen qorshalypty. Al 2008 jyly oblystyq mádenıet basqarmasy jóndeý jumystaryn júrgizgen. Qazirgi ýaqytta aýyldyń kitaphanasy men shaǵyn ortalyq ornalasqan bul úı Qazaqstan Respýblıkasynyń tarıhı-mádenı eskertkishter tizimine enip, memlekettiń qorǵaýyna alynǵan kórinedi.
Qarqaraly aýdanynyń ákimi Erlan Qusaıynnyń aıtýynsha, 2021 jyly tarıhı-mádenı murany saqtaý ınspeksııasy 5,3 mln teńgege ǵımarattyń syrtqy-ishki árleý jumystaryn júrgizip, jylý júıesin aýystyrǵan eken.
– Qazirgi ýaqytta mádenıet jáne tilderdi damytý bólimi óziniń balansyna alyp, 1,5 mln teńge qarajatqa ǵımarattyń bir bólmesin arnaıy jabdyqtap jatyr. Jumys barysynda taqyryptyq stendter ázirlenedi. Ahmet Baıtursynulyna qatysty qujattyq jádigerler qoıylatyn sóreler ornatyldy, – deıdi aýdan ákimi.
Budan bólek Ahańnyń dáris bergen kezeńin sýretteıtin úlken pano daıyndalý ústinde eken. Kitaphananyń kitap sóreleri de jańartylǵan.
Qaraǵandy oblysy,
Qarqaraly aýdany,
Aqterek aýyly
