Atap aıtqanda, elimizdiń Bas mýftıi Naýryzbaı qajy Taǵanulynyń tóraǵalyq etýimen ótken májiliste monopolııa úkimi, musylman emes kisige turmysqa shyǵýdyń úkimi, bırjada aksııany satyp alý jáne satý úkimi, qundy qaǵazdan zeket berý úkimi, AHAT arqyly neke qııýdyń sharıǵı úkimi taqyrybynda ázirlengen pátýalar keńes músheleriniń ortaq sheshimimen qabyldandy. Al olardyń tolyq mátini Qazaqstan musylmandary dinı basqarmasynyń resmı aqparat quraldarynda jarııalanatyn bolady.
Eske salsaq, Ǵulamalar keńesi sharıǵat, salt-dástúr negizderine súıenip, musylman qaýymyn alańdatqan kókeıkesti, túıtkildi máselelerdi talqylap, pátýalar men tujyrymdama qujattar qabyldaıdy.
Keńes jumysynyń aıasynda Bas mýftı Naýryzbaı qajy Taǵanuly Qarqaraly aýdanynyń ákimi Erlan Qusaıynmen kezdesip, aldaǵy ýaqytta Qarqaralyǵa qatysty máselelerge de ún qatyp, qoldaý bildiretinin jetkizdi. Aýdan ákimi Bas mýftımen arada bolǵan sharapatty áńgimeniń kóptegen mańyzdy máselelerdiń basyn shalǵanyn atap ótti.
– Bir saǵatqa sozylǵan áńgime barysynda dástúrli ıslam dininiń qundylyqtary, din men ata dástúr arasyndaǵy baılanystyń úzilmeýi jáne jastardyń búldirgi dinder jeteginde ketpeýiniń aldyn alý sııaqty ózekti máseleler boıynsha pikir almastyq. Aldaǵy ýaqytta da yntymaqtastyq baılanysta bolý týrasynda ýaǵdalastyq, – deıdi E.Qusaıyn.
Ǵulamalar keńesiniń jumysyna qatysqan din ókilderi men teolog mamandar jıyn sońynda Qarqaraly qalasynyń tarıhı oryndaryn aralap, Qunanbaı qajy meshitine táý etti.
Aıta ketetin bir jaıt, mundaı deńgeıdegi jıynnyń Qaraǵandy oblysynyń aýmaǵynda tuńǵysh ótýi jáne onyń qasıetti Qarqaralynyń tórinde uıymdastyrylýy óńirdegi din salasynyń ómirindegi aıtýly oqıǵanyń biri boldy.
