Bul ǵımarat kezinde oblystyq partııa komıteti ornalasqan tarıhı oryn edi. Onyń qabyrǵasyna Jumabek Táshenovke jáne taǵy basqa belgili adamdarǵa arnalǵan eskertkish taqtalar ilingen. Ǵalekeńe arnalǵan taqta sol qatarda J.Táshenovten keıingi orynǵa qoıyldy.
Eskertkish taqtany qoıý saltanatynda oblys ákiminiń orynbasary Ǵanı Nyǵmetov oblys ákimi Qumar Aqsaqalovtyń quttyqtaýyn oqydy. Referendýmnyń aldynda jurtshylyqpen kezdesýge kelgen Prezıdent Q.Toqaevtyń keńesshisi Málik Otarbaev ta óziniń quttyqtaý sózderin aıtty. L.N.Gýmılev atyndaǵy Eýrazııa ýnıversıtetiniń professory, belgili ǵalym Serik Negımov te Ǵalym Maldybaevtyń alǵashqy zertteýshisi retinde óziniń jyly lebizin jetkizdi. Sonymen qatar el gazeti «Egemenniń» bas redaktory Ǵabıt Músirep te óziniń ózekjardy sózderin aıtýmen qatar gazettiń basshysy Darhan Qydyráliniń quttyqtaýyn oqyp berdi. Oblys aqsaqaldarynyń atynan sóılegen Q.Qalıev jáne aqynnyń týǵan jeri – Shal aqyn aýdanynan arnaıy kelgen delegasııa ókilderi jerlesterine jasalǵan qurmetke rızashylyqtaryn bildirdi.
Ǵalym Maldybaev halqymyzdyń tarıhyndaǵy keńestik kezeńniń basynda belsendi qyzmet atqarǵan jan. Onyń qalamynan «Qyrym qyzy» sııaqty epıkalyq poema da dúnıege kelgen. Sonymen birge zamana kúıine ún qosqan «Batyr týraly jyr», «Aq kelin», «Qorqyt batyr» sııaqty jyrlary da oqyrman oljasyna aınaldy. Ol uıymdastyrýshylyq qabileti joǵary qaıratker de bolǵan. Aqmolada shyqqan «Jańa Arqa», Oralda tusaýy kesilgen «Qyzyl tý», Pavlodarda jaryq kórgen «Kolhoz», Balqashta shyqqan «Balqash jumysshysy», Baıanda ashylǵan «Lenın joly» gazetterin alǵash uıymdastyrǵan Ǵalekeń. Árbir gazet aıaǵynan turǵannan keıin ókimet ony jańa basylym ashýǵa jumsap otyrǵan. «Sosıalıstik Qazaqstannyń» ońtústik óńirlerdegi tilshisi qyzmetin de atqarǵan. 1937-1938 jyldardaǵy qandy qasapta Sibir ormandaryn saǵalap, densaýlyǵynan aıyrylǵan. Sodan keıin tek týǵan jerinde ǵana qyzmet etýge májbúr bolady. Aldymen oblys ortalyǵynda, artynan aýasy taza aýylda turýǵa týra keledi. Biraq Ǵalekeń munda da qyzmet etip, mektepte muǵalim boldy, óńirdiń qoǵamdyq ómirine belsene atsalysty. Oblys aqyndarynyń basyn jınap, dúrkin-dúrkin aıtys uıymdastyryp turdy. «Oblystyń halyq aqyny» ataǵyn alǵan Igibaı Álibaev, Ahmetjan Nurtazın, Temirǵalı Qasenov, Ýahıt Temirbekov jáne basqalary Ǵ.Maldybaevtyń aqyl-keńesterin alyp, aqyndyq daryndaryn ushtap otyrǵan. Sonymen qatar Ǵalekeń bolashaqqa jol siltep, túzý baǵyt bergen shákirtteri qatarynda ataqty aqyn-jazýshylar Dıhan Ábilev, Seıitjan Omarov, Ǵabdol Slanov jáne t.b. bar.
Osy kúni S.Muqanov atyndaǵy oblystyq ámbebap kitaphanada Ǵ.Maldybaevtyń qaıta basylǵan «Qyrym qyzy» kitabynyń tusaýkeseri boldy. Aqynnyń artynda qalǵan on bir perzentiniń bári de ómirde óz ornyn tapqan, salıqaly jandar. Sonyń biri áke jolyn qýǵan kenjesi Sábıt Maldybaev qazir «Kazahstanskaıa pravda» gazetiniń bas redaktory bolyp otyr. Uldyń úlkeni Shashýbaı Maldybaev áýesqoı kompozıtor, oblystaǵy mádenı is-sharalardyń bárine kezinde uıytqy bolyp júretin uıymdastyrýshylyq qabileti zor adam. Qyzy Álııa Maldybaeva «Qazaqstannyń eńbek sińirgen muǵalimi», ómir boıy qazaq tili men ádebıetiniń shákirtterin oqytqan tanymal ustaz. Al ánshi qyzy Ǵalııa da óner salasynda, taǵy bir qyzy Alma muǵalim. Aqbaıan men Shákirbaı marqum medısına salasynyń maıtalman mamandary boldy. Uly Altaı uzaq jyldar boıy oblystaǵy baılanys salasynyń bastyǵy bolyp zeınetke shyqty. «Ornynda bar ońalar» demekshi ákesiniń esimin jańǵyrtyp, umytylmaýyna atsalysyp júrgen osy urpaqtary.
Soltústik Qazaqstan oblysy
