Jaýapty vedomstvo ókilderi jergilikti halyqpen kezdesip, kıikke baılanysty ózekti másele kóterildi. Sebebi Oral popýlıasııasyndaǵy kıikterdiń sany 800 myńnan asqan desedi. Halyq osynyń saldarynan jaıylymdyq jerlerde tórt túlikke azyq qalmaıdy dep alańdaýly.
«Kıikterdiń kóptiginen sharýalar japa shegip jatyr. Jaıylymǵa mıllıonǵa jýyq kıik kelse, eshqandaı da shóp qalmaıdy. Bulardyń sany aıtarlyqtaı kóp. Qalaı da azaıtý kerek», dedi Jánibek aýdany Kúıgenkól aýylynyń turǵyny Boranbaı Aıtqalıev.
Ekologııa mınıstriniń orynbasary kıikterdi aýlaý úshin bıologııalyq negizdeme kerektigin aıtty. Sondaı-aq vıse-mınıstr shildeden bastap óńirde erekshe qorǵalatyn tabıǵı aýmaqtar qurylatynyn jetkizdi. Osy arqyly Oral popýlıasııasyndaǵy 250 myńdaı kıikti atalǵan aýmaqta ustap turý kózdeledi.
«Búginde respýblıkalyq mańyzy bar erekshe qorǵalatyn tabıǵı aýmaqtar qurý týraly qaýly shyqty. Qaýmaldyń aýdany 314 504,1 gektardy, rezervattyń aýdany 343 040,1 gektarǵa jetedi. Ol Batys Qazaqstan oblysynyń Bókeı ordasy, Jánibek, Kaztalov, Jańaqala aýdandarynyń aýmaǵynda ornalasatyn bolady. Munda kıiktiń 250 myń basyna deıin saqtalady», dedi Á.Shalabekova.
Qazaqstan aýmaǵynda Betpaqdala, Oral jáne Ústirt sııaqty kıikterdiń álemdik popýlıasııasynyń 95%-dan astamy shoǵyrlanǵan.
