Hokkeı • 07 Maýsym, 2022

Qazaqstan «V» tobynda oınaıdy

165 ret

kórsetildi

2 mın

oqý úshin

Shaıbaly hokkeıden elıtaly dıvızıonnyń kelesi jylǵy álem chempıonaty birden eki elde – Latvııa men Fınlıandııada uıymdastyrylatyn boldy. Sáıkesinshe toptyq kezeńniń oıyndary da Helsınkı men Rıgada ótedi dep josparlanǵan.

Álı BITО́RE

Birer kún buryn Halyqaralyq shaıbaly hokkeı federasııasynyń (IIHF) baspasóz qyzmeti jarııalaǵan málimet boıynsha, 2023 jyly ótkiziletin jahandyq dodanyń «A» tobynda bıylǵy álem chempıony ári jarys qojaıyny Fınlıandııa quramasynan bólek, Shvesııa, Chehııa, Germanııa, Danııa, Fransııa, Aýstrııa jáne birinshi dıvızıonda úzdik nátıje kórsetken Majarstan quramasy óner kórsetetin boldy. Al «V» tobyna álem chempıonatyn qabyldaýshy Latvııa quramasy jetekshilik etedi. Sonymen qatar bul topta Qazaqstan, Kanada, AQSh, Shveısarııa, Slovakııa, Norvegııa jáne tómengi toptan joǵary topqa qosylǵan Slovenııa hokkeıshileri de baq synaıdy.

Álemdegi saıası jaǵdaıǵa baılanysty Fınlıandııadaǵy álem birinshiliginen shettetilgen Reseı men Belarýs quramalary kelesi jylǵy chempıonatqa da qatystyrylmaıtyn boldy. Sondyqtan 2023 jyly Reseıdiń Sankt-Peterbýrg qalasynda ótýge tıis bolǵan chempıonat Latvııa men Fınlıandııada elderinde ótetin boldy.

Álem chempıonatynyń kúntizbesine sáıkes, jahandyq doda 2023 jyldyń 12 mamyrynda bastalyp, 28 mamyrynda máresine jetedi. Qazaqstan quramasy IIHF usynǵan ulttyq quramalardyń jańartylǵan reıtınginde 16-shy orynǵa ıe boldy. Bir qyzyǵy, Reseı (3-oryn) jáne Belarýs (14-oryn) quramalary halyqaralyq matchtar men týrnırlerden shettetilgenine qaramastan reıtıngten shyǵarylmaıdy. Qazirgi ýaqytta álemdik reıtıngte bıylǵy álem chempıony – Fınlıandııa quramasy kósh bastap tur.

Aıta keteıik, Fınlıandııa astanasy – Helsınkı men Tampere qalalarynda uıymdastyrylǵan shaıbaly hokkeıden elıtaly dıvızıonnyń álem chempıonatynda jarys qojaıyndary fınalda Kanadadan basym túsip (4:3), óz tarıhynda tórtinshi márte álem chempıony atanǵan bolatyn. Al úshinshi oryn úshin ótken saıysta Chehııa hokkeıshileri AQSh quramasyn 8:4 esebimen jeńgen edi.

«A» tobynda óner kórsetken Qazaqstan quramasy toptaǵy jeti oıynnyń altaýynda jeńilip (Danııa – 1:9, Fransııa – 1:2, Shveısarııa – 2:3, Kanada – 3:6, Slovakııa – 3:4, Germanııa – 4:5), sońǵy týrda Italııa quramasynan aılasyn asyrdy – 5:2. Osylaısha, Iýrıı Mıhaılıs shákirtteri jalǵyz jeńisiniń arqasynda úsh upaımen segiz komandanyń ishinde jetinshi orynǵa taban tirep, elıtaly dıvızıondaǵy ornyn saqtap qalǵan bolatyn.