«Ulttyq qaýipsizdik komıtetiniń Shuǵyl-tergeý toby K.K.Másimov, A.T.Sadyqulov, D.E.Erǵojın jáne ózge de tulǵalarǵa qatysty QR Qylmystyq kodeksiniń 175-baby 1-bóligi, 179-baby 3-bóligi, 218-baby 3-bóliginiń 3-tarmaǵy, 362-baby 4-bóliginiń 3-tarmaǵy, 366-baby 4-bóligi boıynsha qylmystyq isti tergeýdi jalǵastyryp jatyr.
2022 jyldyń 31 mamyrynda Másimov pen Sadyqulovty qamaýda ustaý merzimi 2022 jyldyń 6 shildesine deıin, Erǵojındi 2022 jyldyń 13 shildesine deıin uzartyldy», dedi QR UQK baspasóz qyzmetinen.
Kárim Másimovti qamaýda ustaý merzimi osyǵan deıin birneshe ret uzartylǵan edi. Buǵan deıin sot sanksııany 2022 jyldyń 6 maýsymyna deıin bergen-di.
Eske sala keteıik, 6 qańtarda Memleket basshysynyń Jarlyǵymen Kárim Qajymqanuly Másimov QR Ulttyq qaýipsizdik komıtetiniń tóraǵasy laýazymynan bosatylǵan edi.
8 qańtarda K.Másimov jáne ózge de tulǵalar ustalyp, ýaqytsha ustaý ızolıatoryna qamaldy. Olardyń ústinen memleketke satqyndyq faktisi boıynsha sotqa deıingi tergeý júrip jatyr.
