Almaly, Áýezov, Bostandyq, Jetisý, Medeý jáne Túrksib aýdandarynyń árqaısysyna 800 mln teńgeden bólindi. Al qalaǵa qosylǵan aýmaqtardy damytý maqsatynda Naýryzbaı men Alataý aýdandaryna 1,3 mlrd teńgeden qarastyrylǵan. (Jalpy somasy 7,4 mlrd teńge).
Almatylyqtardyń ózderi ashyq daýys berý arqyly qala bıýdjetin qandaı bastamalarǵa baǵyttaý kerektigin anyqtaıdy. Ideıa avtorlarynyń ótinimine Almaty qalasy Qoǵamdyq keńesiniń músheleri, sarapshylar, máslıhat depýtattary, ÚEU ókilderi de óz baǵalaryn beredi. Bir jobanyń quny 61,2 mln teńgeden aspaýy tıis.
Jobalyq usynystar kelesi ólshemderge sáıkes bolýy kerek:
- bir avtor – bir ótinim – bir nysan;
- qoljetimdilikti shekteýsiz jalpy paıdalaný nysany;
- nysan iske asyrylýy josparlanǵan aýdan aýmaǵynda, jalpyǵa qoljetimdi jerde ornalasýy kerek;
- ákimdiktiń quzyretinde bolýy tıis jáne t.b.
Qaraýǵa qabyldanbaıtyn jobalyq usynystar:
- qurylys-montajdaý jumystarynsyz tek jobalyq-smetalyq qujattardy ázirleýge arnalǵan;
- bolashaqta qosymsha elementterdi engizýdi talap etetin;
- Almaty qalasynyń damý baǵdarlamasyna, Qazaqstan Respýblıkasynyń zańnamasyna sáıkes kelmeıtin;
- kommersııalyq sıpattaǵy jáne t.b. Aýdan ákimdikteriniń saraptaý komıssııalary jobalardy «Halyq qatysatyn bıýdjetti» uıymdastyrý jáne iske asyrý týraly Erejeniń, Qazaqstan Respýblıkasy zańnamasynyń, Almaty qalasyn damytý baǵdarlamasynyń talaptaryna sáıkes irikteıdi.
Aýdan ákimdiginiń saraptama komıssııasynyń quramyn aýdan ákimi bekitedi, onyń quramyna máslıhat depýtattary, aýdandyq sáýletshi, qurylys salasynyń mamany, qurylys obektileriniń smetalyq qujattamalaryn jasaý jónindegi maman, Almaty qalasynyń Qoǵamdyq keńesiniń, qoǵamdyq uıymdardyń ókilderi kiredi.
«Halyq qatysatyn bıýdjet» boıynsha keńesterdi nemese aqparatty Almaty qalasynyń aýdandyq ákimdikterinen, sondaı-aq Almaty qalasy ákimdiginiń «Open Almaty» qoǵamdyq qabyldaý bólmesinen 224 39 29 (ishki 203) telefony arqyly alýǵa bolady.
