«Qorytyndylardy shyǵarý kezinde Ortalyq komıssııa Almaty qalasy aýmaqtyq komıssııasynyń ótinishin nazarǵa aldy. Aýmaqtyq komıssııa usynǵan materıaldyń negizinde «Respýblıkalyq referendým týraly» Konstıtýsııalyq zańnyń 21, 31-baptaryna sáıkes, Ortalyq komıssııa ákimshilik-aýmaqtyq birlikterdiń jekelegen ýchaskelerinde referendýmnyń ótkizilýin jaramsyz dep tanı alady. Osyǵan baılanysty Almaty qalasynyń №2 ýchaskesindegi daýys berý nátıjeleri referendýmnyń túpkilikti qorytyndylaryna engizilgen joq», dep túsindirdi Nurlan Ábdirov.
Komıssııa tóraǵasynyń aıtýynsha, jaýaptardyń eki nusqasy da tańdap alynǵan, ıaǵnı, jaramdy dep tanylǵan, alaıda daýystardy sanaý kezinde eskerilmeıtin bıýlletender sany 1,58%-dy nemese 125 859 bıýlletendi quraǵan.
«Belgilenbegen úlgidegi ne daýys berýshilerdiń erik bildirýin anyqtaý múmkin emes bıýlletender jaramsyz dep tanylady. Mundaı bıýlletender sany 2,58% nemese 205 924 bıýlletendi quraıdy», dedi ol.
